Finnmárkku Bargiidbellodat bivdá buot Finnmárkku suohkaniid veahkehit váldit vuostá báhtareddjiid go Mátta-Várjjat rahčá dál gávdnamis saji buohkaide.
Finnmárkku Bargiidbellodat bivdá buot Finnmárkku suohkaniid veahkehit váldit vuostá báhtareddjiid go Mátta-Várjjat rahčá dál gávdnamis saji buohkaide.
Finnmárkku Bargiidbellodat lea vuorjašuvvan go nu ollu báhtareaddjit bohtet Finnmárkui Ruošša bokte. Dál ávžžuhit eará Finnmárkku suohkaniid veahkkin váldit vuostá báhtareddjiid go leat jo badjelaš čuođi báhtareaddji geat bohtet measta beaivválaččat ráji rastá.
Spagga dievva juohke sajis
– Mátta-Várjjaga suohkan lea rahpan gaskaboddosaš vuostáiváldima mas leat 150 saji. Doppe lea jo áibbas dievva, ja leat rahpan vel veahkkevuostáiváldinbáikki mas leat 120 saji Mátta-Várjjaga suohkanis. Dát sajit leat maid buot dievvan, nu ahte leat šaddan eará idjadanbáikkiid ja hoteallaid váldit atnui báhtareddjiide, čállá Finnmárkku Bargiidbellodaga fylkkajođiheaddji Ingalil Olsen.
Dáhttot veahki
Cealkámušas lohket sii Mátta-Várjjaga ja vuostáiváldinossodaga boahtán hui váttis dillái ráđđehusa váilevaš áŋgiruššama báhtareddjiid ektui Finnmárkkus.
Báhtareaddjit lassánit čađat geat bohtet Norgii Ruošša čađa. Finnmárkku Bargiidbellodat ávžžuha ráđđehusa jođánepmosit sihtat Olgoriikadirektoráhta (UDI) searvat ovttas Politiijaid olgoriikaossodagain gávdnat orrunsajiid ja eará doaimmaid čoavdit. Olgoriikaeiseváldi ferte maid jođánepmosit, 48 diibmui, sáddet olbmuid ruovttoluotta geain eai leat buorit ákkat manne báhtarit.
Eará suohkanat fertejit veahkkin
– Finnmárkku Bargiidbellodat vuordá Finnmárkku suohkaniid váldit ovddasvástádusa dál go Mátta-Várjjat jo rahčá, ja veahkehit váldit oasi báhtareddjiin suohkaniidda, lohká Ingalil Olsen.
Bargiidbellodaga fylkkajođiheaddji vuordá Olgoriikadirektoráhta sihkkarastit ahte leat bures ráhkkanan veahkehit dearvvašvuođa ektui. Dálá báhtareaddjit galget jođánit beassat servvodahkii Finnmárkkus ja dárogieloahpahus ja bargohárjehallan ferte álggahuvvot jođánit. Suohkanat fertejit oažžut ekonomalaš doarjaga, bálvalusaid fertejit nannet ja fertejit bidjat olbmuid vuostáiváldinbargguide.
