Diibmá bivde luossabivdit 97 300 atlántaluosa Norgga luossajogain. Dat lea buorre lassáneapmi ovddit jagis. 28 proseantta luosain luitojuvvojedje fas jogaide.
Norgga buoremus luossafylkkain, Trøndelágas ja Romssas ja Finnmárkkus, sihke bivde ja godde eambbo luosaid diibmá go ovddit jagi.
Trøndelágas bivde 26 600 atlántaluosa 2022 áigodaga, dat lea 32 proseantta lassáneapmi 2021 áigodaga ektui. Luossabivdit godde 60 proseantta luosain ja reastta luite fas jogaide.
Romssas ja Finnmárkkus bivde ges 21 700 luosa. Dat lea 20 proseantta lassáneapmi 2021 ektui. Davimus guovlluin luite guollebivdit 31 proseantta luosain fas jogaide.
Dán guovtti fylkkas bivdojuvvui bealli buot luosain olles riikkas.
Gaula buoremus
Jagiid go okta Norgga deháleamos jogain, Deanučázádat, lea leamaš giddejuvvon, de leat Trøndelága luossajogat gos buot eanemus luosaid bivdet. Gaulačázádagas bivde 6 400 luosa, Orklas bivde 6 300 luosa ja Namsenčázádagas ges 5 100.
