Dan searvi almmuhii čakčamánu 25. beaivvi. Koreográfa Elle Sofe Sara ja arkiteakta Joar Nango leaba dánsunčájálmasa duohken.
– Vuoitit Dansekritikerprisen guovtti jagi maŋŋálaga dovdo earenoamážin. «Birget» čájálmas lei okta dain váddáseamos dáiddalaš proseassain mainna lean bargan. Ledje nu olu dovddut ja bealit dan tematihkas maid fertii vuhtii váldit ja maiddái olu dánsejeaddjit ja stuora dáiddalaš joavku, muhto mun lean hirbmat duhtavaš dainna maid mii leat olahan, čállá Elle Sofe preassadieđu bokte.
– Lea somá oaidnit movt dát čájálmas ovdána ja iežas vuogi mielde guoskkaha gaskavuođaid Sámi ja dáčča dálá servodaga gaskka. Hui olu giitu Kritikerpris juryi, ja sávan lihku buohkaide geat leat bargan BIRGET čájálmasain, dát lea min bálkkašupmi, loahpaha Sara.
Diibmá vuittii Elle Sofe seamma bálkkašumi «Vástádus eana» čájálmasa ovddas. «Birget» čájehuvvui vuosttaš gearddi Norgga Opera- ja baleahttaviesus guovvamánu 9. beaivvi dán jagi.
Kritihkkáriid searvvi Dánsakritihkkarbálkkašupmái ledje nammaduvvon oktiibuot golbma dánsunčájálmasa dán jagi.
