Romssa suohkanis bohtet garrasit doaimmat koronavirusa dihte.
Dan dieđihedje Romssa suohkandirektevra Mari Enoksen Hult, váldosuohkandoaktar Kathrine Kristoffersen ja sátnejođiheaddji Gunnar Wilhelmsen otná preassakonferánssas.
Romsa lea vuosttaš suohkan Norggas gos olbmos leat gávdnan koronavirusa, ja odne dieđiha váldosuohkandoavttir ahte Romssas leat ovcci olbmo geain lea koronavirus.
Sátnejođiheaddji Wilhelmers muitala preassakonferánssas, man NRK sáddii njuolggosáddagis, ahte son lea odne čohkken ovdagotti čoahkkimii go sii leat gergosat bidjat garrasit doaimmaid johtui jus eiseválddit eai daga dan.
– Áiggun čielgasit dadjat dan ahte mii leat gergosat bidjat garrasit doaimmaid johtui go dat mii lea dál ávžžuhuvvon, dadjá Wilhelmsen.
Čoahkkimis sii ávžžuhit Romssa bargiid bargat ruovttus jus lea vejolaš, ja hástet buot doaluid šluhttet. Skuvllaid ja mánáidgárddiid eai vuos gidde, muhto vurdet makkár doaimmaid dearvvašvuođaeiseválddit bidjet odne johtui.
