Ovddádusbellodatpolitihkkár gáibida ahte Romssa suohkan guorahallá Gáissi giellaguovddáža sirdima ja ávžžuha doaimma máhcahit Moskaluktii.
Ovddádusbellodatpolitihkkár gáibida ahte Romssa suohkan guorahallá Gáissi giellaguovddáža sirdima ja ávžžuha doaimma máhcahit Moskaluktii.
Ullovuotnalaččat rahče guhká oažžumis giellaguovddáža Moskaluktii.
Maŋimuš jagiid leat báikkálaččat vásihan ahte Gáissi giellaguovddáža doaibma ja bargit lea veahážiid mielde sirdojuvvon Romssa gávpogii.
Sii reagerejit garrasit go vásihit ahte leat duvdiluvvon eret giellaguovddáža stivrras ja eai ge leat dan dihte beassan váikkuhit dasa.
Gáibida guorahallama
iTromsø aviissa dieđuid mielde ii leat Gáissi giellaguovddáža sirdin meannuduvvon politihkalaččat.
Dál gáibida Romssa Ovddádusbellodaga jođiheaddji ja suohkanpolitihkkár Bjørn-Gunnar Jørgensen ahte guorahallet ášši.
– Jus fal lea mearriduvvon ahte suohkana sámi giellaguovddáš galgá Ullovuonas, de ferte dan máhcahit Moskaluktii. Jus ii leat dárbu giellaguovddážii doppe, de gal juollu dan heaittihit, lohká son.
Rekrutterenhástalusat
Romssa suohkana kulturhoavda Lisa Hoen čilge ahte giellaguovddážis leat doaimmat Moskaluovttas, muhto ahte bargit barget Romssa gávpogis go eai nagot rekrutteret bargiid boaittobeale guvlui.
Aviisa ii leat lihkostuvvan gávdnat ovtta ge bargoalmmuhusa mas Gáissi giellaguovddáš lea ohcan bargiid Moskaluktii 2010 rájes.
