Johtolatpolitiijat leat čađahan bearráigeahčuid sihke Romssas ja Finnmárkkus maŋimuš jándora. Oktiibuot sáhkohalle 40 biilavuoddji.
Maŋimuš jándora leat politiijat čađahan bearráigeahčuid sihke Romssas ja Finnmárkkus.
Romssa politiijaguovlu dieđiha Twitteris ahte leat mihtidan biilavuddjiid leavttu ja iskan leat go biilavuoddjit čielggus.
Ráisa
Ráissa gávpeguovddážis iske 90 biilavuoddji promillabearráigeahčus, buohkat ledje čilgos.
Gárggonuoris, Ráissa suohkanis ges čađahedje leaktobearráigeahču E6:eš geainnus gos lea lohpi vuodjit 60 kilomehtera diimmus.
Ovcci biilavuoddji sáhkohalle, alimus leaktu mihtiduvvui 76 km/diibmui.
Omasvuotna
Ivguvuonbađas, Omasvuona suohkanis iske maiddái johtolatpolitiijat man jođánit biillat vudje.
Bearráigeahčču čađahuvvui guovllus gos leaktomearri lea 60 kilomehtera diimmus.
22 biilavuoddji vudje menddo jođánit ja sáhkohalle. Politiijat muitalit ahte alimus leaktu mihtiduvvui 82 km/diibmui.
Romsa
Romssa politiijat bissehedje muhtin biilavuoddji Sálliris go balahit ahte badjel 20-jahkásaš dievdu vujii vaikke lei geavahan gárrenmirkkuid.
Sus leat váldán varraiskosa ja politiijat dutket ášši viidáset.
Unjárga
Nuorta-Finnmárkkus leat johtolatpolitiijat čađahan bearráigeahčuid sihke Unjárgga ja Deanu gielddas.
Vuonnabađas sáhkohalle guokte biilavuoddji go vujiiba beare leahtus báikkis gos leaktomearri lea 60 km/diimmus.
Nubbi vujii 72 kilomehtera diimmus.
Deatnu
Sieiddáváris, Deanus ges mihtidedje biillaid leavttu guovllus gos lea lohpi vuodjit 80 km/diimmus.
Viđas sáhkohalle, son gii vujii jođáneamos skirvehii 98 kilomehtera diimmus.
Politiijat leat maiddái iskan vudjet go biilavuoddjit gárrenoaivvis Deanus.
Sii bearráigehčče 106 biilavuoddji. Nuorra dievdu váido go ii lean čielggus.
Hámmárfeasta
Finnmárkku politiijaguovllus dieđihit ahte leat čađahan bearráigeahču Hámmárfeasttas ja Skáiddis.
Sii iske 26 biila- ja skohtervuoddji, ii oktage vuodján lobiheamet.
