-Almmuhus-
-Almmuhus-
OĐĐASAT Beaivváža 40-jagi ávvudeapmi measta beaivvát alde

Beaivváža 40-jagi ávvudeapmi measta beaivvát alde

-

-

Geassemánu 13. beaivvi lei 40 jagi áigi go Beaivváš Sámi Našunálateáhteris lei vuosttaščájálmas.

Beaivváš Sámi Našunálateáhter ávvudii lávvordaga 40-jagi ávvudeami ovttas dálá, ovddeš, boahttevaš ja vuosttaš bargiiguin. Dohko ledje maiddái bovdejuvvon Sámediggi, fylka ja Guovdageainnu sátnejođiheaddji. 

40 JAGI ÁVVUDEAPMI: Beaivváža ávvugáhkku. Govva: Beaivváš Sámi Našunálateáhter
40 JAGI ÁVVUDEAPMI: Beaivváža ávvugáhkku. Govva: Beaivváš Sámi Našunálateáhter

Diehtojuohkinjođiheaddji, Brita Triumf, muitala ahte doalut heivejedje bures dien beaivái, go lei measta beaivvát alde dat albma ávvubeaivi. 

– 13. beaivvi lei juste 40 jagi áigi go «Min Duoddarat» bihtás lei vuosttaščájálmas. Guovdageainnu kulturviessu maid rahppui seamma beaivvi, lohká Beaivváža diehtojuohkinjođiheaddji Triumf.

SUOHKAN ATTII SKEAŊKKA: Suohkan geigii skeaŋkka Beaivvážii. Govas teáhterhoavda Rolf Degerlund ja Guovdageainnu suohkana sátnejođiheaddji Hans Isak Olsen. Govva: Aslak Mikal Mienna
SUOHKAN ATTII SKEAŊKKA: Suohkan geigii skeaŋkka Beaivvážii. Govas teáhterhoavda Rolf Degerlund ja Guovdageainnu suohkana sátnejođiheaddji Hans Isak Olsen. Govva: Aslak Mikal Mienna

Giddejuvvon doalut

Koronadilálašvuođa geažil mearridii teáhter doallat giddejuvvon ávvudoaluid bovdejuvvon gussiide. Beaivet ledje vuos kulturviesus ja eahkes manne stuoralávuide gilišiljus. 

– Min iežamet olbmot čuojahedje doaluin. Emil Karlsen kulturviesus ja min iežamet juoigit juige. Eahkes lávlo min iežame bargit dološ lávlagiid, «Min Duoddarat» lávlagiid, lohká Triumf

LÁVLLUI: Neavttár Emil Karlsen čuojahii. Govva: Aslak Mikal Mienna
LÁVLLUI: Neavttár Emil Karlsen čuojahii. Govva: Aslak Mikal Mienna

Beaivváža diehtojuohkinjođiheaddji muitala ahte doalut eai šaddan stuorrát. Sávaldat lei rievttimielde bovdet álbmoga. 

– Jurdda lei dalle moadde jagi áigi ahte galggai álbmotfeasta. Boahtte háve go ávvudit, de fárret ođđa vissui. Ii go son de oaččo bovdet álbmoga, jurddaša Triumf. 

«Guovssahasa hálddus»

Doaluide bohte olu ovddeš neavttárat, earret eará Nils Gaup ja Knut Walle, geat leigga mielde Beaivváža vuosttaščájálmasas 40 jagi áigi. Ja golggotmánus dán jagi galgá ge maid vuosttaščájálmas ovtta Nils Gaupa čállojuvvon bihtás. 

– «Guovssahasa hálddus» lea Nils Gaup čállán ja son galgá maid bagadit dan. Dán bihttái boahtá maid ođđa nuorra debutánta neavttáriin.

Jurdagat ovddasguvlui

Muđui muitala Triumf ahte teáhter lea olu čoahkkinasttán ođđa vistti dihtii, sihke Statsbyggain ja joatkkaskuvllain.

– Jus buot manná nu jođánit go galgá, de lea mis oktasaš viessu sámi joatkkaskuvllain 2024:i čavčča. Dál livččii áigi ahte oažžut vistti, lohká Beaivváža diehtojuohkinjođiheaddji Brita Triumf. 

-Almmuhus-