Deaddiluvvon golmma geardde ovdal, ja dál deaddiluvvo fas.
«Beaivi, áhčážan» lea Nils-Aslak Valkeapää diktagovvagirji mii dál fas prentejuvvo.
Girjjis leat divttat davvisámegillii ja sullii 390 čáhppes-vilges boares historjjálaš gova Sámis. Divttat ovttas govaiguin lea mátki sámiid historjjás ja eallimis. Boares govaid Áillohaš čohkkii govvavuorkkáin miehtá máilmmi.
Deaddiluvvo njealját geardde
Girjelágádus DAT lea deaddilan diktagovvagirjji 1988:s, 1989:s ja 1991:s. 2018:s dán mánu deaddiluvvo dát njealját geardde. Girji lea dasa lassin jorgaluvvon vel dárogillii (1990), suomagillii (1992), islándda gillii (1997) ja eaŋgalasgillii (1997).
Davviriikkaid girjjálašvuođa bálkkašupmi
1991 oaččui Áillohaš Davviriikkaid girjjálašvuođa bálkkašumi dán girjji ovddas.
