Finnmárkku álbmotjienasteami boađus fylkkaidovttasteamis addo njuolga stádaministarii, dainna doaivagiin ahte meannudit ášši ođđasit Stuoradikkis.
Finnmárkku álbmotjienasteami boađus fylkkaidovttasteamis addo njuolga stádaministarii, dainna doaivagiin ahte meannudit ášši ođđasit Stuoradikkis.
– Jus mun livččen stádaministtar, ja Stuoradiggi lea guovtti oaivilis, measta juste bealis juhkkon, ja dasa lassin álbmot vel čuorvu «ii», de gal livččen jurddašan ahte lea jierpmálaš ođđasit meannudit ášši Stuoradikkis, lohká Bargiidbellodaga joavkojođiheaddji Finnmárkku fylkkadikkis, Remi Strand.
Dan son cealká NTB ođasfitnodahkii.
Gielda- ja ođasmahttinministtar Monica Mæland (Olgeš) deaivvadii fylkkapolitihkkariiguin Čáhcesullos gaskavahkku. Sihke singuin geat leat mielas, ja sii geat eai leat mielas.
Su gal ii sáhttán boastut ipmirdit, Romsa ja Finnmárku galget oktan fylkan šaddat, beroškeahttá maid álbmotjienasteapmi čájeha.
Persovnnalaččat buktit
Seammás oaččui Mæland dieđu ahte fylkkasátnejođiheaddji Ragnhild Vassvik (Bb) áigu ieš doalvut stádaministarii Erna Solbergii (Olgeš) álbmotjienasteami bohtosa.
– Mii vásihit maid doarjaga eará sajiin riikkas, sii oidnet ahte ođđa fylka šaddá eahpelunddolaš stuora ráhkkanussan, lohká Remi Strand.
Guokte stuoradiggemearrádusa
Mæland lohká NT:i ahte su bargu lea jođihit ovttasteami, earret jus Stuoradiggi meannuda ođđasit ja eará bohtosiin.
– Ráđđehusa bealis háliidit čađahit Stuoradikki mearrádusaid, sihke daid maid ovdal ja maŋŋil 2017 válggaid leat mearridan. Mun lean maid ávžžuhan fylkkapolitihkkariid nammadit miellahtuid oktasaš lávdegoddái, ja deattuhan ahte lea hoahppu, lohká son.
(©NTB)
