Sámi álbmotbeaivvi suddadedje olu váimmuid iežaset juoigamin. Dál leat hárjehallan vel eambbo ja gergosat fas lávket lávddi ala.
Básjuoigit guoimmuhedje sámi álbmotbeaivvi várjjatluđiiguin, ja leat dál fas gergosat lávket lávddi ala.
Odne eahkes lágiduvvo Nuoraid kulturdeaivvadeapmi (NKD) Unjárggas. Bottus lávkejit smávva juoigit fas lávddi ala guoimmuhit várjjatluđiiguin.
Guhká hárjehallan
Básjuoigit leat smávvadási oahppit Unjárgga Oahppogáldus, sihke dárogiel ja sámegiel luohká oahppit.
Sii leat dálvvi miehtá hárjehallan várjjatluđiid fárrolaga sámegiel giellakonsuleanttain Åsa Márgget Antiin.
Juoiganoahpahus lágiduvvo Isak Saba guovddáža bokte Unjárgga gielddas.