Basiid áigge leat eambbosat vánddardeame luottaid alde. Go leat eambbosat vánddardeame, šaddá stuorát várra ahte lihkohisvuođat dáhpáhuvvet. Trygg Trafikk rávve olbmuid váldit gulul ja vánddardit várrogasat.
Basiid áigge leat eambbosat vánddardeame luottaid alde. Go leat eambbosat vánddardeame, šaddá stuorát várra ahte lihkohisvuođat dáhpáhuvvet. Trygg Trafikk rávve olbmuid váldit gulul ja vánddardit várrogasat.
Fargga álgá luopmu. Dat lea maid huššaáigi.
Duháhiid mielde biilavuoddjit leat jođus lupmui, soitet vel biillaid deavdán koaffariiguin, sabehiiguin, ja juovlaskeaŋkkaiguin.
Preassadieđáhusas rávve Trygg Trafikk johtolatorganisašuvdna, olbmuid váldit buori áiggi go vulget vánddardit basiid áigge.
– Go leat olu biillat luottaid alde, de lea maid stuorát várra ahte lihkohisvuođat dáhpáhuvvet. Jus lea olu gálvu biillas, lossa siivu, ja soaitá vel hušša, dalle sáhttet lihkohisvuođat dáhpáhuvvat. Mii rávvet olbmuid váldit gulul, ja vánddardit várrogasat, lohká Trygg Trafikk gulahallanhoavda Ann-Kathrin Årøen.
Dan maŋemuš viđa jagis, leat gaskamearálaččat logi olbmo duššan johtolagas juovlamánus.
Ale leage beare duostil
Trygg Trafikk čállá pressadieđahusas ahte olbmuide lea dávjá deháleabbo ollet jođánit, go ollet dearvan.
Dat dagaha ahte olbmot doaladit johtileabbo go maid galggašii.
Alla leahttu ja várálaš meaddelvuodjimat dagahit olu dain váráleamos lihkohisvuođain.
– Lea dehálaš muddet leahtu, čuovvut johtolaga, ii ge čađahit várálaš meaddelvuodjimiid. Vuojidettiin lea dehálaš ahte eai leat jurdagat eará sajis, lohká Årøen. Son rávve maid olbmuid ahte eai geavat mátketelefuvnna vuojidettiin.
Mátketelefuvdnii sáhttá bidjat oasi sivas, lihkohisvuođain. Trygg Trafikk rávve ahte ii galgga čuoggut mátketelefuvnna go vuodjá biillain.
– Ii okta ge diehtu dahje snap:a leat nu dehálaš ahte lea dan veara geahččat daid vuojidettiin.
