Sámediggepresideanta Aili Keskitalo nammadii bearjadaga Guovddášbellodaga Anne Toril Eriksen Balto (40) ođđa politihkalaš ráđđeaddin.
Sámediggepresideanta Aili Keskitalo nammadii bearjadaga Guovddášbellodaga Anne Toril Eriksen Balto (40) ođđa politihkalaš ráđđeaddin.
Guovddášbellodaga sámediggejoavku dat lea rávven presideantta Balto nammadit ráđđeaddin Sámediggeráđđái 2017-2021 áigodahkii.
Balto šattai dán jagi sámediggeválggain Guovddášbellodaga 1. várrelahttun Ávjovári válgabiirres, ja galgá leat Guovddášbellodaga jietna ođđa ráđis.
Ovddeš sátnejođiheaddji
Anne Toril Eriksen Baltos lea guhkes ja govda politihkalaš hárjáneapmi Guovddášbellodagas, ja 34-jahkásažžan šattai son Kárášjoga gieldda vuosttaš nisson sátnejođiheaddji.
Son lea dál válljejuvvon maiddái Finnmárkku fylkkadiggái
– Mun mielas áiggun Anne Toriliin ovttas bargat, ja lean vissis dasa ahte son buktá deaŧalaš beliid Sámediggeráđi bargui dán áigodagas, dadjá sámediggepresideanta Aili Keskitalo.
Balto áigu virgái álgit dakka maŋŋá ođđajagi.
Loga maid: Dát galget sámedikki politihka jođihit ja hábmet (Á+)
Jođihanoahppu
Balto lea revisoran oahppan ja sus lea lassioahppu ekonomiijastivremis ja organisašuvnnas ja jođiheamis.
Dál son bargá finánsa ráđđeaddin Seastinbáŋkkus 1 Davvi-Norga, seammás go lea gárvvisteamen loahpa ekonomiija ja strategalaš jođiheami masterbarggu Norgga árktalaš universitehtas Romssas.
Balto lea Guovddášbellodagas leamaš sihke báikkálaš searvvi jođiheaddjin, Finnmárkku Guovddášbellodaga nubbi jođiheaddjin, Guovddášbellodaga guovddášstivrra várrelahttun ja Finnmárkku guovddášnissoniid luohttámušdoaimmain.
Balto lea maid leamaš mielde Guovddášbellodaga sámepolitihkalaš ráđis.
