Ođđa raporta čájeha ahte golmmas juohke logi norgga nuoras leat oaidnán muhtuma plánemin dahje čađaheamen doarruma sosiála mediaid bokte. Sosiála mediaaktevrrat nugo TikTok ja Snapchat leat gohččojuvvon eambbo ovddasvástádusa váldit.
Mediabearráigeahču raporta muitala earret eará ahte 31 proseanta leat unnimusat oktii oaidnán ahte muhtin pláne dahje čađaha doarruma sosiála mediaid bokte, čállá NRK. Ahkejoavku lea gaskal 13 ja 18 jagi čájeha raporta.
Raporta maid čájeha ahte alkohola- ja gárrenmirkovuovdin sosiála mediaid bokte lea lassánan maŋimuš jagi, olles 28 proseanttain ja 23 proseanttain.
Mediabearráigeahčus leat fuolastuvvon go ballet dát sáhttá dahkat veahkaválddálašvuođa dábálažžan, ja dasa lassin lasi noađi dasa gii lea doaruhuvvon jus filmmat ja govat levvet sosiála mediain. Mediabearráigeahčus maid lohket alkohola- ja mirkovuovdima váttisvuohtan, go dát dagaha ahte eanet nuorat álget daiguin.
Mediabearráigeahčus hástet sosiála mediaid aktevrraid váldit ovddasvástádusa.
