Lappi universitehta árktalaš eamiálbmotdutkamuša professor Rauna Kuokkanen, Jovnna Jon Ánne Kirstte Rávdná, lea ožžon goalmmat riikkaidgaskasaš girjebálkkašumi.
Máilmmepolitihka dutkiid álbmogiidgaskasaš searvi International Studies Association (ISA) juohká jahkásaččat bálkkašumiid jagi buoremus girjjiide.
Rauna Kuokkanen dahje Jovnna Jon Ánne Kirstte Rávnná girji «Restructuring Relations: Indigenous governance, gender and self-determination», man lea almmustahttán Oxford University Press (2019), lea ožžon ISA Feminist Theory and Gender Studies -dieđasuorggi bálkkašumi.
Girji oaččui maid diibmá British International Studies Association ja Canadian Political Science Association girjebálkkašumiid.
Jury cealká Kuokkanen čájeha mo Kanada, Ruonáeatnama ja Sámi eamiálbmotnissoniid jienat leat jávohuhtton iešmearrideami barggus formaliseret eamiálbmogiid vuoigatvuođaid álbmotrievttis ja nationála láhkaásahemiin. Jury cealká girjji čuvge dán hilgojuvvon fáttá mii guoská eamiálbmotpolitihka ja sohkabeliid oktavuhtii ja buktá ođđa dieđálaš máhtu eamiálbmogiid feministtalaš politihkkii go dat buohtastahttá daid nissoniid dili daid riikkain.
Jury mielas lea girjjis teaksta bures čállon ja áddehahtti ja buktá ođđa jurdagiid lohkkái, čállet preassadieđáhusas.
