Finnmárkku politiijameašttir Ellen Katrine Hættai oaččui bálkkašumi iežas máŋgga jagi nanu ja persovnnalaš áŋgiruššamis oppalašsuodjaleami ja gearggusvuođa hárrái.
Vuossárgga ja maŋŋebárgga lágiduvvui totalforsvarskonferansen, oppalašsuodjaluskonferánsa Romssas, gos earret eará geigejedje gearggusvuođabálkkašumi 2022 Finnmárkku politiijameašttir Ellen Katrine Hættai. Lea Norsk Totalforsvarsforum mii addá bálkkašumi, ja Ellen Katrine Hætta lea Oppalašsuodjaluskommišuvnna miellahttu.
Jury čállá ahte dán háve leat mearridan addit bálkkašumi siviila sektorii. Sii čállet ahte Ellen Katrine Hætta lea olles bargoeallimis čájehan beroštumi servodatsihkarvuhtii ja gearggusvuhtii. Sihke go lea sáhka eastadit ja mo gearggusvuohta galgá praktihkalaččat doaibmat go dáhpáhusat gevvet.
Viidásat čállá jury ahte Ellen Katrine lea guhkit áigi čájehan nanu ja persovnnalaš áŋgiruššama servodatsihkarvuođas ja gearggusvuođas. Sus lea maid beroštupmi davviguovlluide iige leat balus čájehit dan. Son oaivvilda ahte earret eará lagasvuohta Ruššii dagaha ahte Norggas ferte lea garra, nanu ja árjjalaš leahkin Finnmárkkus, go beare heajos gearggusvuohta sáhttá čuohcat heahtedustenvuogadahkii. Ellen Katrine oaivvilda ahte politiijahelikopter berre leat Girkonjárggas nu go dilli lea dál.
