11,25 miljárdda ruvdno ovddas vuvdo báikkálaš borramuš ja juhkamuš Norggas.
Maŋemuš jagiid lea beroštupmi oastit báikkálaš borramuša lassánan. Lassáneapmi guoská buotlágan báikkálaš borramuššii. Buvdaborramuša logut leat leamašan dovddusin máŋga jagi, muhto dán jagi lea Matmerk maiddái mihtidan man ollu báikkálaš borramuš ja juhkamuš vuvdo borramušbáikkiin ja stuorraruovttodoalus.
– Ráđđehusa mihttu lea leamašan ahte gálgá vuvdot 10 miljárdda ruvnno ovddas ovdal jagi 2025, muhto dál leat jo olahan dan mihtu buriin margiinnain. Dat muitala juoidá báikkálaš borramuša kvalitehta birra ja olbmuin lea dáhttu geavahit báikkálaš borramuša. Seammás addá dat bargosajiid, čájeha kultuvrra ja gullevašvuođa, ja ollu, ollu eambbo, dadjá eanandoallu- ja biebmoministtar Olaug Bollestad preassadieđáhusastis.
