Kulturdepartemeanta lea ovddidan báikenammalága láhkaásahusa rievdadeami.
– Sámediggi lea earenoamáš duhtavaš go maiddái bihtán- ja ubmisámegielat leat váldon mielde gulaskuddannotáhttii, dadjá sámediggeráđđi Mikkel Eskil Mikkelsen (NSR) sámedikki preassadieđáhusas.
Báikenammaláhka, miessemánu 18. b. 1990 láhká nr. 10 báikenamaid birra (báikenammaláhka) rievdaduvvui 2019:s, ja ođđa láhka bođii fápmui suoidnemánu 1.b. 2019. Dan vuođul lea dál Kulturdepartemeanta ovddidan báikenammalága láhkaásahusa rievdadeami.
Ođđa láhka
Láhkaásahusat galget rievdaduvvot ja heivehuvvot ođđa lága mielde. Báikenammaláhka ja dan láhkaásahusat regulerejit báikenamaid čállinvuogi, maiddái sámegiel báikenamaid. Sámi báikenamat gávdnojit miehtá Sámi, ja sámi báikenamat lea ášši mii guoská olu suohkaniidda Norggas.
– Bealisteamet leat Sámedikkis earenoamáš duhtavaččat go maiddái bihtán- ja ubmisámegielat leat váldon mielde gulaskuddannotáhttii, dadjá sámediggeráđđi Mikkel Eskil Mikkelsen (NSR). Ovdalaččas leat davvi-, julev-, lulli- ja nuortalaš sámegielat mielde báikenammaláhkaásahusas.
Buori ovttasbargu
Sámediggi ja Kulturdepartemeanta leat bures ovttasbargan láhkaásahusa rievdadeami gulaskuddannotáhta hábmemis, ja Kulturdepartemeanta válddii vuhtii eanas Sámedikki cealkámušaid ja oaiviliid.
– Sámediggi lea duhtavaš Kulturdepartemeantta njuovžilis gulahallamiin, dadjá sámediggeráđđi Mikkelsen. Báikenammalága láhkaásahus boahtá gulaskuddamii dál ovdalaš juovllaid, ja Sámediggi sávvá ahte suohkanat, giellaguovddážat, organisašuvnnat ja eará berošteaddjit váldet áiggi vástidit gulaskuddamii, loahpaha MiIkkelsen.
