Buoremus bivdu lei jogain Trondheimsfjorden lahkosis.
Norske Lakseelver organisašuvdna dieđiha ahte muđui Norggas lei bivdu muhtun sajiin buorre ja eará sajiin ii lean.
Diimmá luossabivdu jogain lei dat heajumus goassege. Okta čilgehusain dása lei ahte lei goike jahki ja lei váttis bivdit. Dán jagi lea dilálašvuohta leamaš áibbas eará ja vuordámuš lei ahte eambbo luosat goddojit.
Norske Lakseelver organisašuvdna doaimmaha bivddu ollu jogain. Sii oaivvildit ahte heajos bivdu lea balddihahtti, go ollu doaibmabijut leat biddjon johtui nannendihte luossanáli.
– Birrasiid 102 000 luosa lea ollu buoret go heajos diimmájahki, muhto lea ain guhki dan lohkui mii mis lei dušše moadde jagi áigi. Ovdáneapmi manná boasttu guvlui ollu báikkiin, dadjá Norske Lakseelver váldočálli Torfinn Evensen preassadieđáhusas.
Doaibmabijut mat leat biddjon johtui leat earret eará kálket jogaid main lea suvrra njuoskkadat ja Gyrodactylus salaris luossa parasihtta lea jávkaduvvon eambbo go 40 jogas ja luossa lea fas máhccagoahtán dáidda jogaide. Leat maid unnit luosat mat goddojit mearrabivddus maŋŋel go bivdu lea bissehuvvon dahje garrasit gáržžiduvvon.
