Buot skuvllat berrejit fállat skuvlaipmilbálvalusa ja seammaárvosaš fálaldaga ohppiide geat eai mana girkus, ávžžuhuvvo Oahpahusdepartemeantta ođđa bagadusas.
Buot skuvllat berrejit fállat skuvlaipmilbálvalusa ja seammaárvosaš fálaldaga ohppiide geat eai mana girkus, ávžžuhuvvo Oahpahusdepartemeantta ođđa bagadusas.
Maŋimuš jagiid leamaš eahpečielggas galget go skuvllat láhčit ja fállat ipmilbálvalusa ohppiid várás.
2016 Gielddaid raporta čájehii ahte váile 3000 skuvllas šluhttejedje birrasii 600 skuvlla ipmilbálvalusa.
Maŋŋel go Stuoradiggi bivddii Oahpahusdepartemeantta čielggadit njuolggadusaid skuvlaipmilbálvalusa ektui, lea našunála bagadus rievdaduvvon.
Buot Norgga skuvllat ávžžuhuvvojit fállat skuvlaipmilbálvalusa, muhto maiddái seammaárvosaš fálaldaga sidjiide geat eai mana girkus.
Sávvá eanet skuvlaipmilbálvalusaid
Dál sávvá oahpahus- ja integrerenministtar Jan Tore Sanner ahte eanaš oassi skuvllain fállet skuvlaipmilbálvalusa.
– Lea hávski go nu olu skuvllat fállet girkostallama juovllaid áigge. Risttalašvuođa vierut ja kulturárbi han leat lunddolaš oasit skuvllas, ja ipmilbálvalusa bokte lea buorre dan vásihit, dadjá Sanner NTB ođasdoaimmahahkii.
Ođđa bagadusas čállo ahte skuvllat galget fállat ovdamearkka dihte fáddábeaivvi, lohkanbottu, lávlunbottu, čuovgafeastta dahje eará aktivitehtaid ohppiid várás geat eai oasálastte ipmilbálvalusas.
Skuvlaloahpaheamit galget fátmmastit buot ohppiid, ja danin ii berre skuvlaipmilbálvalus leat das oassin.
