Badjel 300 000 páhka vurkkoduvvojit Norgga poasttakantuvrrain ja buvdapoasttain, ja dál ávžžuha Poasta olbmuid viežžat iežaset páhkaid nu jođánit go vejolaš.
Badjel 300 000 páhka vurkkoduvvojit Norgga poasttakantuvrrain ja buvdapoasttain, ja dál ávžžuha Poasta olbmuid viežžat iežaset páhkaid nu jođánit go vejolaš.
Black Friday ja juovlagávppašeapmi dagahit ahte Norgga poastakantuvrrain ja buvdapoasttain leat erenomáš olu páhkat maid olbmot leat diŋgon.
Dál leat 100 000 eanet páhka go beannot vahkku áigi, páhkat leat lassánan beliin, čállá Poasta preassadieđáhusas.
Olahus
Oktiibuot vurkkoduvvojit badjel 300 000 páhka buvdapoasttain.
Dál ávžžuha Poasta olbmuid viežžat páhkaid nu jođánit go vejolaš.
– Badjel 300 000 páhka lea ođđa olahus, ja páhkat lassánit vel eanet go dál go juovllat lahkonit. Mađi jođáneappot olbmot vižžet iežaset páhkaid, dađi buoret, ávžžuha Norgga Poastta preassahoavda John Eckhoff.
Čiegadit juovlaskeaŋkkaid
Røa Meny buvdapoasta oaivegávpogis vásiha ahte páhkat lassánit juovlamánus, ja sii sávvet ahte olbmot vuoruhit viežžat páhkaid.
Dađi bahábut leat ovdal vásihan ahte olbmot bohtet viežžat páhkaid justa ovdalaš go sáddejuvvojit ruovttoluotta.
– Mii diehtit ahte muhtimat diktet páhkaid orrut buvdapoasttain vai nagodit čiegadit maid leat oastán juovlaskeaŋkan, ja vai mánát ja guoimmit eai gávnna páhkaid ovdal juovlaruohta. Mun ávžžuhan olbmuid baicce viežžat páhkaid farggamusat ja gávdnat vuogas báikki páhkaide ruovttuin, dadjá Røa buvdapoasta Majla Leto.
Áppa
Juohke jagi lassána neahttagávppašeapmi 15 proseanttain.
Vaikke olu páhkat dolvojuvvojit poastakássaide ja ruovttuide, de leat ain olu páhkat mat sáddejuvvojit poasttakantuvrraide ja buvdapoasttaide.
Poasta árvala ahte olbmot berrejit viežžat Poastta applikašuvnna mii guorrá páhkaid. Dalle oažžu dieđu dakkaviđe go páhkka lea ollen buvdapostii, dasa lassin muittuha áppa olbmuid viežžat páhka jus leat buvdapoastta lahkosis.
Dasa lassin dieđiha Poasta ahte olbmot álkit sáhttet diŋgot páhkaid gitta ruoktot.
