Finnmárkkuopmodagas (FeFo) dieđihit ahte miessedeattut leat njiedjan, uhccán ealggat báhččon ja hástet seammás bivdiid gáhttet ronuid.
Čakčamánu 1. beaivvi álggii ealgabivdu Kárášjogas ja Guovdageainnus. Čakčamánu 1 .beaivvi rájes leat dán rádjái báhččon 144 ealgga. Ihttin, bearjadaga, álgá ealgabivdu olles Finnmárkuopmodagas.
Ávžžuha
Finnmárkkuopmodaga (FeFo) meahcceossodaga jođiheaddji Einar Johannes Asbjørnsen raportere Ávvirii mo sii vásihit bivddu dán rádjái. Sus lea erenomážit okta ávžžuhus bivdiide.
– Mii vásihat ahte bivdit báhčet menddo olu ronuid, mii ii leat buorre. Min ávžžuhus bivdiide lea ahte eai galgga báhčit daid, dadjá Finnmárkkuopmodaga (FeFo) meahcceossodaga jođiheaddji Einar Johannes Asbjørnsen.
Hivvodaga gáhttet
Asbjørnsen muitala ahte vaikke bivdiin lea lohpi báhčit ronu, de sii eai ávžžut dan. Sivva lea go rávis ealli galgá guoddit ealgahivvodaga viidásat.
– Dat lea dieđus rávis ealli, muhto vaikke ii leat miesi guoddán dán jagi, de sáhttá ain boahtte jagi guoddit. Sáhttá maid massán heajos dálvvi geažil miesi, dadjá Asbjørnsen.
Uhccán ealggat báhččon
Čakčamanu 1. beaivvi rájes leat báhččon 144 ealgga. Dáid loguid gávnnat FeFo ruovttusiiddus. Asbjørnsen muitala Ávvirii ahte dát jahkásaš bivdu lea njozet mannan ja unnán ealga lea báhččon.
– Diimmá ektui leat uhcit ealggat báhččon, muhto seammás leat seamma dásis go 2018:s, dadjá Asbjørnsen Ávvirii.
Miesit smávvát
FeFo bealis maid vásihit ahte miesit lea smávvát dán jagi.
– Dán jagi leat uhccán miesit báhččon. Muhto dát mat dieđihuvvon báhččon leat leamaš smávvát. Dasa sáhttá sivvan leat mannan dálvi, mii lei lossat, dadjá Asbjørnsen.
Intensiiva beaivvit
Ihttin, bearjadaga, álgá ealgabivdu olles Finnmárkuopmodagas. Asbjørnsen muitala ahte sidjiide ja bivdiide leat miellagiddevaš beaivvit ovddos guvlui.
– Šaddet intensiiva beaivvit. Buot gielddain álgá bivdolohpi, 200 ealgabivdi leat leamaš bivddus, bearjadaga rájes leat 300 bivdi, dadjá Asbjørnsen.
