Ruoŧa bealde lea Sámedikkii nammadan bargojoavku ásaheame soabadan- ja seanadanlávdegotti ja ávžžuhit álbmoga sáddet iežaset oaiviliid.
Ruoŧa beale Sámedikki soabadan- ja seanadanlávdegotti bargojoavku dieđiha preassadieđáhusas ahte dál, go covid-19 njoammudávda lea jođus, de lea váttis gulahallat sámi álbmogiin nu mo lei jurdda go álggahedje dán barggu. Eai ge olat buohkaid digitála čoahkkimiinge. Čiežalahtot stivrenjoavku lea danin mearridan ahte lassin dáid čoahkkimiidda, de galgá leat vejolaš sápmelaččaide sáddet iežaset oaivila čálalaččat sidjiide. Diehtojuohkinčálus sáddejuvvo fargga álbmogiid iešguđet vugiin. Dan čállosis lea čujuhus gosa galgá sáddet iežas oaivila.
– Lea hirbmat dehálaš ahte du oaivil maid boahtá oidnosii, lohká stivrenjoavkku jođiheaddji Marie Enoksson.
Stivrenjoavkku lahtut lohket sii erenoamážit háliidit diehtit makkár fáttáid berrešii soabadan- ja seanadanlávdegoddi meannudit. Stivrenjoavku jáhkká olu sápmelaččat vurdet dán lávdegotti ásaheami go Ruoŧas váilu gelbbolašvuohta sápmelaččaid dili birra.
Eambbo dieđuid gávdná dás: https://www.sametinget.se/sanningskommission
