Suoma beale Sámediggi lágida ávvudeami skábmamánu 28. beaivvi Sámekulturguovddážis Sajosis Anáris.
– Lea dehálaš, ahte mii beassat ávvudit sámiid parlameantta 50-jagi mátkki Suomas. Dál lea buorre addit dovddastusa sámepolitihka pionéraide ja maiddái sierra logiidjagiid áigge mielde váikkuhan buot sámepolitihkkariidda, dadjá Sámedikki ságajođiheaddji Tuomas Aslak Juuso preassadieđu bokte.
Dála Sámedikki ovdal doaimmai Suoma beale sámi parlameanta, mii vuođđuduvvui skábmamánu ovccát beaivvi 1973 ja doaimmai gitta 1995 rádjái. Suoma beale dálá Sámediggi vuođđuduvvui 1996 álggus iežas lágain jagi 1995 ođasmahtton vuođđolága vuođul. Dál Sámedikki váldodoaimmahat lea Anáris Sámekulturguovddáš Sajosis, gos maiddái Sámedikki čoahkkimat dollojit iežas parlameantasáles.
– Sámedikki doaibmagieddi lea viidon ja barggut leat lassánan dovdomassii jagiid mielde. Sámediggi leage okta dain sámiid ruovttuguovllu mearkkašahtti bargoaddiin ja Sámediggi addá barggu lagabui 80 olbmui juogo fásta dehe mearreáigásaš doaimmain, muitala Sámedikki hálddahushoavda Pia Ruotsala-Kangasniemi.
Sámiid parlameantta 50-jagi ávvudeapmái leat bovdejuvvon sámi parlameantta ja maiddái Sámedikki lahtut sierra válgabajiin, sámeservoša váikkuheaddjit, Suoma stáhta ja sierranas oktasašbargoorgánaid ovddasteaddjit ja daid lassin Sámedikki bargit.
