Ávviris lassánedje lohkkit dán jagi vuosttaš jahkebeali. Dál leat Ávviris eanet diŋgojeaddjit go goassege ovdal leat leamaš.
Dál leat almmuhuvvon jagi 2022 vuosttaš jahkebeali lohkkiidlogut, buohtastahtton seamma áigodagain diibmá. Norgga aviissain leat obbalaččat unnon lohkkiidlogut, muhto sámi aviissaide gal baicca lassánit lohkkit.
Ávviris leat dál 1328 diŋgojeaddji, mii lea 64 eanet go diibmá seamma áigodaga, ja 4,8 proseantta lassáneapmi. Logut čájehit sihke báberaviissa ja digitála diŋgojeddjiid. Ávvira váldodoaimmaheaddji Kari Lisbeth Hermansen lohká dan logu historjjálažžan.
– Vuosttaš geardde Ávvira historjjás 2008 rájes lea mis lea lohkkiidlohku badjel 1300. Dat lea buorre, go lea man ovdii mii álo bargat. Mii ráhkadit buktaga mainna min lohkkit leat duđavaččat ja maid sii hálidiit lohkat. Ja go lohkkiidlogut lassánit, dat muitalit mii leat rievttes geainnu alde, dadjá Hermansen.
Diibmá ledje minusa bealde
Diimmá jagis, 2021:s, ledje Ávviris sihke vuosttaš ja nuppi jahkebeali minuslogut. Hermansen lohká Ávvira dihtomielalaččat čuvvon lohkkiid sávaldagaid, ja danne doaivu son Ávvir lea lihkostuvvan.
– Mii čađahit lohkkiidiskkademiid juohke jagi, ja geahččalit iežamet sisdoalu ja strategiijaplána heivehit lohkkiid oaiviliid ja sávaldagaid mielde. Mii leat ođđasiidda bidjan eanet deattu, muhto seammás maid magasiidnaáššiide. Min lohkkit háliidit maid guhkes čállosiid ja guhkebuš reportášaid. Ja de mii lea joatkán podcasttaiguin, mat leat hui bures váldon vuostá. Leat maiddái streamen, mainna leat vehá gaskkalduvvan maŋŋel korona, dadjá Hermansen.
Son lasiha ahte Ávviris lea dál sierra sisdoallu nuoraide ja nuorra rávisolbmuide «Nuorra Sámis», vaikko dat ii leat váikkuhan loguide mat dál leat almmuhuvvon.
– Lea somá go nubbi sámi aviisa, Ságat, maid ovdána, ja go sis leat vel hui buorit plussalogut. Olu dáčča aviissat leat maŋŋel korona vehá massán lohkkiid, sihke lohkkiidloguid neahtas ja dáin loguin mat dál leat almmuhuvvon. Muhto sámi aviissat leat nagodan doalahit lohkkiid maid maŋŋel korona, ja vehá spiehkastit dan trendas mii muđui oidno riikkas neahttalohkkiid loguid ektui, dadjá Hermansen.
Ságahii lassánan 118 diŋgojeaddji
Ságat lea maid ovdánan olu. 2022 vuosttaš jahkebeali ledje sis 3101 lohkki, ja leat lassánan 118 lohkkiin, mii lea 3,8 proseantta lassáneapmi. Váldodoaimmaheaddji Geir Wulff lohká iežas hui duhtavažžan.
– Orru leamen nu ahte sámi álbmot liiko min aviisii. Lea somá oaidnit ahte sámi aviissat ovdánit go eará aviissat mannet maŋos. Mun jáhkán olbmot leat fuomášan ahte Ságat ja Ávvir leat aviissat mat beroštit sámi áššiin. Mun doaivvun dieđusge dat lea goargŋuma duogábealde, dadjá Wulff.
Wulff ii loga sin maidege rievdadan Ságat aviissas mii livččii čilgen ovdáneami. Eanas lea nu movt álo lea leamaš, sii čuvvot mielde buot mii dáhpáhuvvá Sámi servodagas.
Ságat aviissas leat dál vuosttaš geardde eambbo digitála diŋgojeaddjit go báberdiŋgojeaddjit. Váldodoaimmaheaddji čilge ahte sin stuora ovdáneapmi lea boahtán digitála diŋgojeddjiin. Sii leat moatti jagi áigi juo olahan ovddit mihttomeari mii lei 3000 diŋgojeaddji. Muhto eai áiggo eisege ložžet leahtu.
– Mii eat duđa dainna, mii áigut ráhkadit vel buoret aviissa sámi guovlluide ja álbmogii, dadjá Wulff.
