Ávvir árvvoštallá dán jagáš Sámi Grand Prixa luođis luohtái ja lávlagis lávlagii.
Musihkkaoasi árvvoštallá sámi musihkar ja máŋgga geardde Sámi Grand Prix lávlunoasi vuoiti, Johan Kitti.
Erenoamáš dán jagi lea ahte ii lean generálageahččaleapmi man Ávvira árvvoštalli beasai čuovvut, ii ge leat beassan gullat lávlagiid ovdagihtii. Son lea čuvvon Grand Prix sáddaga neahtas.
Árvvoštallamat leat čállon dađistaga go artisttat ovdanbukte lávlagiid ja ovdal go vuoiti almmuhuvvui.
YARSEM GALKIN & ROMAN YAKOVLEV – MOAJNAS ‘SEEJJTJAA’VR BAJAS
Yarsem Galkin lea čállán teavstta ja Roman Yakovlev lea fas ráhkadan musihkka dán gielddasámegiel rap-lávlagii. Lávlagis lea buorre ritma ja go dan guldala de lea álki čuovvulit dan. Dat lea lávlaga refreaŋga mii lokte lávlaga. Muđui lea lávlun/rap oalle ovttageardán ja manná oalle seammaládje nu guhká go lávlun/rap bistá. Dán lávlaga ferte moddii guldalit ovdal go dat darvána miilii. Dan dihte in jáhke ahte dát lávlla lea daid golmma buoremusaid olis.
EIRA – MÁILMMI NIEIDA
Eira oappážagat bođiiga nubbin Sámi Grand Prix 2019.
Dán lávlaga lea Anne Inger E. Lilleng čállán. Son lea ovttas Marit Elisabeth Eira:in ja Bongg’ Ánttiin ráhkadan šuoŋa.
Dán lávlagis lea buorre ritma ja šuokŋa. Go guldalii dán lávlaga de dat dakkaviđe darvánii milli. Lea maid hui movttegis lávlla. Máilmmi nieidda lávlagis lea maid luohti hui guovddážis mii maid loktii lávlaga. Anne Ingera ja Marit Elisabetha juoigan maid darvánii dakkaviđe milli ja jáhkán ahte dát lávlla ii boađe leahkit daid golmma buoremusaid joavkkus dán gilvvus.
INGÁ MÁIIÁ BLIND – FÁRRUI
Ingá Máiiá lea dán jagi nuoramus oasseváldi.
Niels Ovllá Oskal Dunfjell ja Berit Margrethe Oskal leaba čállán ja ráhkadan šuoŋa dán lávlagii. Dán lávlagis lea buorre šuokŋa ja melodiija.
Go gullen dán lávlaga vuosttaš gearddi de dat darvánii dakkaviđe miilii. Ingá-Máiiá:s lei hui buorre ja čielga lávlun jietna ja su jietna ja lávlun lokti lávlaga. Mu mielas sus lea dán jagaš gilvvu buoremus lávlun jietna. Dat dahkka dan ahte dát lávlla soaita leahkit dán jagaš vuoiti lávlun oasis. Oanehaččat sáhttá dadjat ahte lei buorre lávlla mii boahta gullot ollu maŋŋel dán gilvvu.
AILU VALLE & INGÁ MÁRJA SARRE – BEASSÁŠLIHKKU
Ailu Valle ja Ingá Márjá Sarre leaba ovttas čállán nuohta ja teavstta dán hip-hop lávlagii. Šuoŋa lea Tatu Aarnivala ráhkadan. Dán lávlagis lei buorre šuokŋa ja melodiija muhto mu mielas dan ferte moddii guldalit ovdal go dat darvána millii. Lávlagis lei maid juoigan guovddážis mii maid lokti lávlaga.
Muđui oidnui maid ahte soai leaba ollu čuččodan lávddiid nalde ja leaba hárjánan dása. Lávlu guovttis ledje maid buorit jienat. Mun jáhkán ahte dát lávlla boahta leahkit daid golmma buoremusaid olis dán gilvvus.
BERNT MIKKEL HAGLUND – STOAGADIT DOLAIN
Bernt Mikkel Haglund searvá iežas čállojuvvon lávlagiin Stoagadit dolain.
Bernt Mikkel Haglund lea čállán sihke šuoŋa ja sániid dán lávlagii. Inga Laila Hætta lea jorgalan teavstta davvisámegillii. Sus lei mielde Ville Söderbaum gii čuojahii saksofovnna.
Dán lávlagis lei buorre melodiija ja leaktu. Lei lávlaga refreaŋga mii lokti lávlaga. In jáhke ahte dát lávlla olaha daid golmma buoremus jovkui muhto boahta gal gullot ollu rádios manjel daid gilvvuid.
HILDÁ LÄNSMAN & LÁVRE – JOĐI
Hildá Länsman já Lávre Johan Eira leaba fárrolaga čállán dán lávlaga mainna searvaba. Dán lávlagis lei buorre leaktu ja lei maid earálagán go dat eará lávlagat, juoigama ja lávluma ektui. Juoigan ja luohti lei guovddážis dán lávlagis ja gullui ahte lávlu guovttos leaba ollu juoigan ovdal. Lávlla bázii bures millii manjel go dan lei vuosttas gearddi gullán. Lea earenomážit juoiganvuohki ja jienat mat bahče milli. Jáhkán ahte dát lávlla boahta leahkit daid golmma buoremusaid joavkkus ja boahta gullot ollu manjel daid gilvvuid.
