Ailu Valle & Ingá Márjá Sarre – Beassášlihkku
Anárlaš ráppár, Áilu Valle, ja neavttár Ingá Márjá Sarre, Guovdageainnus, oassálastiba vuosttaš geardde SGP:s joavkun. Ingá Márjá lea almmolaččat ovdal sihke juoigan ja lávlon, ja neaktán earret eará Beaivváš Sámi Našunálateáhteris.
«Beassášlihkku» leaba artistta guovttos ieža čállán ja Tatu Aarnivala lea komponeren šuoŋa.
EiRA – Máilmmi nieida
Oappášguovttos, Marit Elisabeth Eira ja Anne Inger E Lilleng, leaba áidna lávlunoasis geat ovdal leaba oassálastán Sámi Grand Prixas. 2019:s oassálasttiiga vuosttáš geardde fárrolaga. Muđui leaba goappašagat searvan 90-logus. Anne Inger lea maid oktii vuoitán. Soai boahtiba Ráissas, muhto rievtti mielde leaba Mázes eret.
Lávlaga lea Anne Inger čállán. Anders P. Bongo lea komponeren ovttas Marit Elisabethain.
Bernt Mikkel Haglund – Stoagadit dolain
Bernt Mikkel Haglund, Guovdageainnus eret, bargá produseantan ja lea komponeren máŋga SGP lávlaga, earret eará lávlaga mainna Inger Karoline Gaup vuittii jagis 2018:s, «Oahppan lean». Son lea oktii 90-logus ieš maid oassálastan SGP lávlunoasis.
Dán jagi oassálastá lávlagiin man ieš lea komponeren ja čállán, ja Inga Laila Hætta lea jorgalan teavstta davvisámegillii. Ville Söderbaum čuojaha saksofovnna. Lávlla lea dan birra ahte sáhttá boastut mannat jus diktá oalgguhuvvot.
– Mun illudan ja lean gearggus oassálastit. Dieđusge lea šállošahtti go eai leat geahččit. Ledjen maid illudan deaivvadit ja ovttasbargat eará musihkkáriiguin, muhto de šaddá digitálalaččat. Muhto dan gal doaivvun šaddat gelddolažžan ja somán liikká.
Mo doaivvut vuoitovejolašvuođa leat? jearrá Ávvir.
– In leat gullan daid eará oassálastiid, muhto iežan mielas lea mus buorre lávlla, vástida Bernt Mikkel.
Lávre ja Hildá – Jođi lea buoret go oru
Guovdageaidnulaš Lávre Johan Eira ja ohcejohkalaš Hilda Länsmann oassálastiba vuosttaš geardde seamma joavkkus. Lávre lea ođđa sámi artista, guhte earret eará lei mielde SGP-coveris, mas nuorat galge ođasmahttit boares Sámi Grand Prix luđiid ja lávlagiid. Hildá lea guhkit áigge bargan musihkan ja lea mielde joavkkuin VILDÁ, Solju ja Gájanas. Son ja su eadni, Ulla Pirttijärvi, oassálasttiiga jagis 2015 Suoma Eurovision-gilvvus ja beasaiga goalmmát sadjái lávlagiin «Hold Your Colours».
Lávlaga, mainna oassálastiba, leaba ieža čállán ja ieža komponeren.
– Lávlaga mainna letne searvame lea Hildá hutkan maŋŋel go deaivvadeimme Sámi Music Awards-doaluin diibmá. Dan álgojurdaga vuođul letne ovttas čállán ja komponeren dan lávlaga, čállá Lávre Ávvirii.
Roman Yakovlev ja Yarsem Galkin – Máinnas Sieidejávri birra
Roman ja Yarsem leaba Lujávrris eret, Ruošša bealde. Roman lea produseanta ja diibmá almmuhii son skearru Spotifyi. Lávlla mainna oassálastiba lea Roman komponeren, ja Yarsem lea čállán teavstta ja son lávlu gielddasámegillii.
Ingá Máiiá Blind – Fárrui
Debutánta, Ingá Máiiá Blind, lea Gárasavvonis eret ja lea dán jagáš nuoramus oassálasti. Son ii leat áibbas amas musihkkamáilbmái. Earret eará lea son lávlon SGP Cover skearrus, mas nuorat galge ođasmahttit boares Sámi Grand Prix luđiid ja lávlagiid. Son illuda ja lea gearggus vaikke šaddá digitála hámis.
– Go in leat ovdal searvan, de in dieđe makkár vuordámušat mus sáhttet leat. Gehččiid ovddabeale ovdanbuktit oaččun dego fámu, ja danne lea veahá váivi go dán jagi eai leat geahččit. Muhto mun illudan aŋkke, muitala Ingá Máiiá.
Teavstta ja šuoŋa lávlagii mainna Ingá Máiiá oassálastá, leaba Niels Ovlla Oskal Dunfjell ja Berit Margrethe Oskal bidjan. Lávlla lea dan birra go olmmoš dovdá muhtomin láhppon, iige dieđe gii ieš lea, iige dieđe makkár luotta galgá válljet.
– Diehttelas lean ieš maid dovdan dakkár dovddu. Mun lean dan dovdan mu musihkain ja artistaeallima ektui, muhto dieđán mun háliidan ollesáiggi bargat musihkain. Dat lea mu niehku, dan luotta háliidan váldit, muitala Ingá Máiiá.
