Stáda geaidnodoaimmahagas ossodatdirektevra Heidi-Kristin Herbst jáhkká eambbosat válljejit biilavuodjinkurssain ja bajášvuodjimis geavahit biillaid automáhtagiiran go ráhkkanit vuodjit el-biillain.
– Geassemánus čađahuvvo 8904 bajášvuodjima B luohkás min johtolatstašuvnnain. 51 %, dahje 4541 dáin, ledje automáhtagiiran. Oktiibuot buot vuodjinkoartaluohkáin leat geassemánus 15.241 bajášvuodjima leamaš, ja 45 % leat vuodján biillain mas lea automáhtagiira, dadjá Heidi-Kristin Herbst.
Lea leamašan, ja lea ain, stuorámus lassáneapmi mátta-norgga gávpogiin, muhto lohku bajášvuodjimiin automáhtagiiran, lassána maiddái eará stuora gávpogiin Norggas.
– Loahpas ferten muittuhit ahte sii geat leat vuodján bajás automáhtagiiran eai beasa vuodjit vuojániin mas lea manuálalaš giira, dadjá Herbst.
