Áibmoambulánsabálvalus HF lea soabadan Norgga áibmoambulánsabálvalusain doaimmahit bissovaš ambulánsahelikopterstašuvnna Girkonjárggas.
Soahpamuš sihkkarastá Nuorta-Finnmárkui bissovaš ambulánsahelikopterbálvalusa seamma dásis go olles riikkas. Soahpamuš galgá álggahuvvot guovvamánu 1. beaivvi 2021.
Girkonjárgga ambulánsahelikopterstašuvdna galgá doaimmahit ambulánsahelikoptera Airbus H145, ja galgá fállat dan seamma kvalitehta- ja sihkarvuođadási go Norgga riikka eará ambulánsahelikopterstašuvnnat.
– Soahpamuša bokte mii sihkkarastit álbmogii sihke oktilaš ja bissovaš bálvalusa našuvnnalaš standárdda bokte. Goappašagat leat leamaš hui dehalaččat midjiide, dadjá Davvi Dearvvašvuođa hálddahusdirektevra Cecilie Daae.
Eallilan pilohtat
Dan rájes go gaskaboddosaš stašuvdna álggahuvvui geasset, lea Norgga áibmoambulánsa válljen geavahit sakka eallilan pilohtaid Girkonjárggas. Go dál álggahuvvo bissovaš stašuvdna, de leat bargoveagat juo ožžon buori ja varas hárjánumi geasi rájes.
– Guhkes hárjánupmi ja báikkálaš máhttu addá midjiide stuorát ja buoret vejolašvuođa čađahit buori barggu, seammás váldit vára pasieanttas ja helikoptera bargoveagain. Dan bissovaš soahpamuša vuođul, man mii leat ožžon, áigot mii fuolahit ahte addit ja fállát Nuorta-Finnmárkku álbmogii buoremus bálvalusa Girkonjárgga stašuvnnas, dadjá Norgga áibmoambulánssa hálddahusdirektevra, Leif Olstad.
Finnmárkku buohcceviessu
Finnmárkku buohcceviesus lea ambulánsahelikoptera medisiinnalaš ovddasvástádus, ja sis leat anestidoaktárat birrajándora fáktavuorus.
