Romssa fylkkasuohkan háliida geavahit ruhtalána skuvllaide ja johtalusdoaimmaide.
Romssa fylkkasuohkan háliida geavahit ruhtalána skuvllaide ja johtalusdoaimmaide.
Romssa fylkkaráđđi lea ráhkadan árvalusa 2019-2022 bušeahtta- ja ekonomiijaplánii, man galget Fylkadikkis meannudit juovlamánu gaskamuttus.
Fylkkaráđđi dáhtošii investeret 4 miljárdda ruvnnu oahpahussuorggis ja johtalusdoaimmain.
– Dáinna árvalusain čájehit ahte dáhttut áimmahuššat boahtteáiggi. Mii doarjut fylkka buori ovdáneami gos lea unnán bargguhisvuohta, lassi nuorat geat čađahit joatkkaskuvlaoahpu ja ealáhussuorgi mii stuorru, dadjá plána- ja ekonomiija fylkkaráđđi Widar Skogan preassadieđáhusas.
Tuneallat, uđassihkkarastin ja geainnut
Romssa fylkkaráđis lea áigumuš geavahit badjel 2,5 miljárdda ruvnnu johtalusdoaimmaide.
Sii áiggoše sihkkarastit ja divodit tuneallaid, čađahit uđassihkkarastima ja gárvet geaidnoprošeavttaid mat leat álggahuvvon fylkkas.
Ođđa skuvllat
Romssa fylkkasuohkan eaiggáduššá ja jođiha joatkkaskuvllaid, ja fylkkaráđđi háliida investeret 1,452 miljárdda ruvnnu oahpahussuorgái.
– Mii árvalit geavahit ruđaid Ishavsbyen joatkkaskuvlii Romssa gávpogis ja dáhttut maiddái hukset ođđa skuvlla Hársttáide. Mii árvalit maid ásahit 50 ođđa láigolanja ohppiid várás, lohká Skogan.
Oahpahussuorggis árvalit maid geavahit ruđaid fidnoohppiide ja oahpaheddjiide.
