Ruonáeatnama Kuupik V. Kleist jođihišgoahtá Árktalaš Álgoálbmot Filbmafoandda stivrra.
– Mii leat hui rámis dainna go Árktalaš Álgoálbmot Filbmafoandda vuosttaš stivrras leat mielde nu máŋga čeahpes ovddasteaddji miehtá árktalaš guovllu, ja geain lea nana gelbbolašvuohta sihke filmmain ja maiddái guovllu kultuvrrain, dadjá Internašunála Sámi Filbmainstituhta direktevra Anne Lajla Utsi preassadieđáhusastis.
Internašunála Sámi Filbmainstituhtta almmuhii njukčamánu álggus ahte ásaha ovttasbarggus eará árktalaš guovlluid institašuvnnaiguin Árktalaš Álgoálbmot Filbmafoandda (AIFF).
Ovttasbargoguoimmit leat Canada Media Fund, Nunavut Film Development Corporation, Greenland Film makers – FILM. GL ja Archy Ruoššas.
Dan almmuhedje Álgoálbmot Filbmakonferánssas, Sámi allaskuvllas Guovdageainnus.
Stivrajođiheaddji
Ruonáeatnanalaš Kuupik V. Kleist lea dál nammaduvvon Árktalaš Álgoálbmot Filbmafoandda stivrajođiheaddjin.
Kleist lea politihkkár ja ovdal doaibman earret eará Ruonáeatnama stádaministtarin (2009-2013).
Eará stivralahtut leat :
Irlándda filbmabuvttadeaddji Mike Downey, guhte lea dál European Film Academy várreságajođiheaddji. Downey lei maid mielde ásaheamen ja doaibmá Film and Music Entertainment buvttadanfitnodaga direktevran. Davvi-Norgga Feastariemuid direktevra Maria Utsi. Son lea maid doaibman Varangerfestivála direktevran.
Norgga beale Sámi filbmabagadalli ja neavttár Nils Gaup. Son lea dovddus earret eará «Ofelaš» (1987) ja «Guovdageainnu Stuimmit» (2008) filmmain.
Ruošša filbmabuvttadeaddji. Arctic State Institute of Culture and Art riikkaidgaskkasaš ossodaga jođiheaddji Sardana Savvina ja
Nunavut Film Development Corporation direktevra Huw Eirug Kanadas. Eirug lea bargan olu bagadallin ja buvttadeaddjin álgoálbmot filmmaid buvttademiin ja oktasašbuvttademiin sihke Stuorra-Británnias ja Kanadas.
Ovttasbargu
Árktalaš Álgoálbmot Filbmafoanda lea riikkaidgaskasaš ovttasbargu, mas leat mielde ovttasbargoguoimmit olles árktalaš guovllus; Alaskas, Kanadas, Ruonáeatnamis, Sámis ja Ruoššas.
Áigumuš foanddain lea ovddidit alladásat árktalaš álgoálbmot filbmaprošeavttaid ja oktasašbuvttademiid, mat ovddidit álgoálbmogiid kultuvrraid, gielaid ja servodagaid.
Guovddážis leat dálkkádat, biras, álgoálbmogiid vuoigatvuođat ja hukset kapasitehta. Árktalaš Álgoálbmot Filbmafoanda ásahuvvo Internašunála Sámi Filbmainstituhta vuollái.
