Babcock Scandinavian AirAmbulance dieđiha ahte vuosttaš girdi dan golmma girdis maid válde eret bálvalusas go fuomášededje ahte backup-vuogádat ii doaibman, lea juo divvujuvvon ja lea bálvalusas. Dan guokte eará girdi leat maid bálvalusas moatte beaivvi rájes.
Babcock Scandinavian AirAmbulance dieđiha preassadieđáhusas ahte dan golmma ambulánsagirdis maid válde eret bálvalusas go fuomášedje ahte girdi backup-vuogádat ii doaibman, lea okta girdi juo bálvalusas.
Dál leat divvumin dan guokte maŋimuš girdi.
Boasttuvuohta gávdnon ja divvojuvvon
Maŋŋá go fuomášedje ahte oassi backup-vuogádagas mii fuolaha ahte girdivuoddji sáhttá seaivvuhit girdi jus buot eará instrumeanttat heitet doaibmamis, de leat girdifabrihkka ja buvttadeaddji áššedovdit bargan birra jándora gávdnat ja divvut dan oasi.
Maŋŋá divvuma leat sii girdán olu gerddiid dárkkistan dihtii doaibmá go nu mo galgá ja dál lea girdi ortnegis.
Ambulánsagirdi biddjui bálvalussii bearjadaga gaskaija.
Sihkkarvuohta dehálamos
Riska ahte buot instrumeanttat heitet doaibmamis oktanaga, lea hui uhccán.
Jus backup-vuogádaga oassi heaitá doaibmamis, de doaibmagoahtá fas go ođđasit bidjat girdimohtora johtui áimmus.
Girdifabrihkka oaivvildii danin ahte girdiid sáhttá ain dorvvolaččat geavahit.
Dattetge háliidii Babcock sihkarvuođa dihtii váldit dán golbma eret bálvalusas, dassážii go fabrihkka ja backup-vuogádaga buvttadeaddji leat gálgan čuolmma.
Vuordit dan guokte girdi maid gárvánit
Babcock rehkenastá dan guokte maŋimuš girdi maid geargat divvojuvvot fargga.
– Dál leat dárkkisteamen ja iskamin dan guokte maŋimuš girdi. Dál go fabrihkka ja backup-vuogádaga buvttadeaddji leat gávdnan siva manin oassi ii doaibman, de biddjojuvvojit dát guokte girdi bálvalussii lagamus beivviid, čilge Babcock Scandinavian AirAmbulance teknihkalaš hoavda Øystein Hobbelstad.
