Jus Romssa ja Finnmárkku eai ovttastahte, de háliida Álttá Ovddadusbellodat earránit Finnmárkkus, ja šaddat oassin Romssas.
Jus Romssa ja Finnmárkku eai ovttastahte, de háliida Álttá Ovddadusbellodat earránit Finnmárkkus, ja šaddat oassin Romssas.
Álttá Ovddadusbellodaga (FrP) jođiheaddji Odd Erling Mikalsen oaidná dušše ovdamuniid das jus ovttastahttet dan guokte fylkka. Jus ovttastahttin ii dáhpáhuva, de háliida bellodat gávpoga ássiid diktit mearridit galget go oassin šaddat Romssas.
– Finnmárkku fylkaoaivegávpogis lea ovttageardánis fokus, ja leat vajálduhttán Finnmárkku mutuvrra, Álttá, lohká Mikalsen Klassekampen áviisii.
Miessemánu 14. beaivvi lea álbmotjienasteapmi, galget go dat guokte fylkka ovttastuvvot.
Gielddaministtar Monica Mæland (Olgeš) lea juo cealkán ahte áššis lea loahppaboađus.
– Lossat ipmirdit
Professora Asbjørn Røiseland Davvi Universitehtas Bådådjos ii hilggo ahte oktiičaskin sáhttá bissehuvvot.
– Sii geat leat álggahan dán álbmotjienasteami, leat dahkan dan dainna doaivvuin ahte sáhttet rievdadit mearrádusa. In dieđe man realisttalaš jurdda lea, muhto ii sáhte hilgut ge. Politihkalaš mearrádus gusto dassážii go nubbi dahkko, lohká Røiseland NTBii.
Álttá Bargiidbellodaga jođiheaddji Ole Steiner Østlyngen ii doarjjo Mikalsena cealkámuša.
– Lea veaháš lossat ipmirdit maid áigot. Lea go dá signála ahte ráđđehus jorggiha gáibádusas, vai lea go populisttalaš, jearrá son.
(©NTB)
