Sámi álbmotbeaivvi beasai viimmat Iŋgor Nilá rohttestit luođi man lea bidjan Álttá suohkanii.
– Lean bidjan Álttá suohkanii luođi ja das dajahalan movt lea leamaš dolin, dadjalii Iŋgor Nilá ovdal go rohttestii luođi Álttá gávpotšiljus Sámi álbmotbeaivve ávvudeamis.
(VIDEO VUOLLELIS ÁŠŠIS)
«Soames stuora bárru dat gal lea duškalan Álttávutnii.. Ja Jiepmaluovttas báktesárgumat muitalit dan doloža.
Nu dajahalai son dán luođis.
Vehá teknihkalaš váttisvuođaid haga gal ii beassan dán luođi ovdanbuktit, go jietnarusttet jaskkodii go lei juoigame.
– Ii dat orron galgame dát luohti, árvalii juoigi, muhto lágideaddjit ožžo johtui fas rusttegiid, ja Nils Peder dahje Iŋgor Nilá beasai fas juoiggastit.
Iŋgor Nilá muitala ahte son lei Jiepmaluovttas Álttás, ja go lei geahčadeame merrii, de luohti bođii sutnje.
– Mun lean bidjan dajahusaid doloža birra, dajahusat mat muitalit sihke báktesárgumiid, luosa ja mearragátti birra. Muhtin muddui oažžu gal dulkot maid dajahalan, dadjá Iŋgor Nilá.
Áigu hárjehallat
Álttá sámiid searvvi jođiheaddji Brita Julianne Skum muitala ahte sin sámi searvi dat lea diŋgon Nils Pederis dan luođi dan oktavuođas go son lei evttohuvvon Sámi Music Awardsai vuoitin árbeguoddin. Dat doalut ledje maid Álttás dán vahkkoloahpa.
– Áltá han lea don doložis leamaš Sápmi, nu ahte orru hui lunddolaš. Ii go son dat luohti dagut ahte olbmot šaddet vel sáhkkideabbot ja ain stuorru beroštupmi historjái ja sámevuhtii go sin guovllus lea luohti. Dáppe leat nu olu sámi institušuvnnat ja olu skuvllat gos lea sámegiella, nu ahte mu mielas lea hui lunddolaš ahte Áltái bođii dál luohti. Ja dien luođi mun gal boađán hárjehallat, go dat galgá gullot, dadjala Skum movttegit.
Siseatnama juoiganmálle mearragáttis
Dát luohti lea siseatnama juoiganmálle mielde, go luohtedahkki han boahtá Guovdageainnus. Dat gal heivii Skum mielas bures.
– Mii fertet ohcat dakkáriid geat máhttet juoigat. Mun in goit dieđe ovttage gii juoigá mearrasámi luođi dáppe. Muhto dáppe dat gal leat olu siseatnan sápmelaččat, go ollu sogat leat boahtán Guovdageainnus, dadjá son.
Geahča video ja guldal luođi dás:
– Gievruda Álttá sámiid
Norgga Sámiid Riikkasearvvi (NSR) sámediggeráđđi ja presideantaevttohas Silje Karine Muotka gal lea vuordán luođi Áltái.
– Dajan viimmat, go mu mielas lea áibbas lunddolaš ahte lea luohti Álttás ja galgá gullot juohke háve go mii deaivvadit. Dat han livččii niehku mu mielas maid. Lea hui illudahtti go leat oallugat boahtán deike odne ja go mis lea vel luohti dál dáppe, erenoamáš dán áiggi go lea pandemiija eai ge olbmot sáhte deaivvadit. Luohti ligge váimmu ja gievrudahttá min. Nu dovddan goit mun. Ja Álttá luohti maid gievruda Álttá sámi servodaga, dadjá Muotka.
