Almmuheaba geasselávlaga

Herman Rundberg ja Mari Boine almmuheaba bearjadaga geassemánu 26. beaivvi, lávlaga «Fillii Fillii», masa Rundberg lea bidjan šuoŋa ja Boine ges čállán teavstta.

– Mari Boine han lea okta Norgga stuorámus artisttain, seammás go mun lean bajásšaddan su musihkain ja mánnávuođa rájes gullan su earret eará Riddu Riđu festiválain. Nu lea dego niehku mii ollašuvvá go suinna beasan lávlaga almmuhit, čilge Rundberg.

«Fillii Fillii» lea oassi «Northern Soul – The Album» skearrus man Rundberg almmuha čakčat, ja dát singel lea nubbi singel man almmuha albumas. Northern Soul lea diŋgojuvvonbuktu man Rundberg ráhkadii 2014 Várjjatfestiválii.

Vaikke Rundberg lohká ge leat niehkun ovttasbargat Boinein, de soai leaba ovdal čuojahan fárrolaga ja ovttasbargan, earret eará Guovdageainnu-stuimmiid filbmamusihkaoktavuođas, muhto dál leaba vuosttaš geardde fárrolaga ráhkadan lávlaga.

– Lávlla lea dakkár positiiva lávlla, mas soaitá veahá geassedovdu ja masa roahkka sáhttá dánsestit. Das leat urbána ritmmat, seammás go das lea dakkár davviduoddariid ja váriid dovdu, čilge Rundberg lávlaga birra.

Guldal oasáža dás:

Ođđa lávlagis čuojahit maid Davvi-Norgga Opera ja Symfoniijaorkester. Teavstta lea Mari Boine bidjan.

– Jus njuolgut dulko lávlaga de sáhttá dadjat ahte dat lea ráhkásmuvvama birra ja daid vuordámušaid birra mat olbmuid gaskkas sáhttet leat dakkár dilis, čaibmá Rundberg.

– Juohke lávlla dan ođđa albumas čužžot iežaset julggiid alde seammás go leat oassin stuorát diŋgojuvvonbuktagis ja nu diehttelasat maid gullet oktii. «Fillii Fillii» dáidá leat dat lávlla mii lea eanemus elektronika-lágan, ja dat soaitá Mari Boinei leamaš ođđa suorgin, dadjá Rundberg.