Juolludit 16 miljovnna vai rávesolbmot sáhttet váldit oahpu.
NORGA: Eiseválddit juolludit 16 miljovnna ruvnno geahččalanprošektii mii galgá nannet fidnofága Kompetansepluss-ortnega čađa.
– Mii fertet ráhkkanahttit olbmuid boahtteáiggi bargoeallimii. 2030:s sáhttet váilot 100 000 fágabargi. Dus lea eambbo oadjebasvuohta barggu dáfus ja dehálaš gelbbolašvuohta jus lea fágareive, dadjá oahppo- ja integrerenministtar Jan Tore Sanner (Olgeš) preassadieđáhusas.
Vuđolaš máhttu
Kompetansepluss-ortnet álggahuvvui diibmá. Dat addá oasseváldiide oahpahusa vuđolaš máhtus, nu go lohkamis, čállimis, IKT:s ja dáro- dahje sámegielas. Dat galgá dan oktavuođas mas áigu váldit fágareivve. Mihttojoavkkus leat bargit geain lea unnán vuđolaš máhttu, muhto seammás guhkes bargohárjáneapmi.
Kompetanse Norge lea dán rádjai ožžon 78 ohcama, ja dain leat 52 ožžon doarjaga. Diibmá ledje 34 prošeavtta maid gaska juhkkojuvvui 10,5 miljovnna ruvdno. Dat leat huksenfágat geat ožžot eanemus ohcamiid iešguđet fágasurggiin.
– Norga dárbbaša fágabargiid. Mii álggaheimmet ortnega go fágareive lea vástádus ollu čuolmmaide min servodagas. Fitnodagat ožžot gelbbolašvuođa maid dárbbašit, ja nu nagodit gilvvohallat, loahpaha Sanner.
