Kriminálafuolahus álggaha dál veahkketelefovnna oapmahaččaide, ja dohko lea vejolaš riŋget ovccis iđđes gitta golmma rádjái beaivái.
Koronadoaibmabijut leat dagahan earret eará ahte giddagasa ássit eai sáhte šat oažžut permišuvnna, ja oapmahaččain ii leat vejolašvuohta fitnat guossis giddagasas. Muhto go eai bease fitnat guossis, de leat ássit ožžon eambbo riŋgenáiggi ja sis lea maid vejolašvuohta riŋget video bokte.
Kriminálafuolahus lea dal álggahan veahkketelefovnna, gosa dubmehallan ja háldogiddagasa olbmuid oapmahaččat sáhttet riŋget, ja oažžut dieđuid ja veahki.
Veahkketelefovdna biddjo johtui cuoŋománu 15. beaivvi, ja dohko lea vejolaš riŋget ovccis iđđes gitta golmma rádjái beaivái. Vuosttažettiin geahččalit dan fálaldaga cuoŋománu 29. beaivái, ja jus doaibmá bures, de árvvoštallet viiddidit fálaldaga.
(©NTB)
