Guovdageainnu kulturskuvla ja Giellagiisá álggahit somás ja ođđa doaimmaid dán čavčča. Dan oktavuođas lágiduvvo odne diehtojuohkinčoahkkin kulturviesus.
Guovdageainnu kulturskuvla ja Giellagiisá álggahit somás ja ođđa doaimmaid dán čavčča. Dan oktavuođas lágiduvvo odne diehtojuohkinčoahkkin kulturviesus.
Guovdageainnu kulturskuvla ja Giellagiisá dieđihit preassadieđáhusas ahte sii čohkkejit fálaldagaid ja álggahit oktasaš doaimmaid mánáid, nuoraid ja rávisolbmuid váras.
– Mii háliidit fállat iešguđetlágán fálaldagaid ja álggahit oktasaš doaimmaid sihke mánáide, nuoraide ja rávisolbmuide Guovdageainnus. Mii fállagoahtit earret eará teáhterkurssa mánáid ja nuoraid várás, ja čuojahan- ja lávlukurssaid. Áigumuš lea álggahit kultureahkediid juohke disdaga gosa čohkket oktasaš doaimmaid iešguđet ge surggiin. Dáinna lágiin áigut ovddidišgoahtit kulturskuvlla ja giellaguovddáža doaimmaid Guovdageainnu suohkana álbmogii, lohkaba Guovdageainnu kulturskuvlla Inger Anne Gaup ja Giellagiissá Inga Ragnhild Gaino.
Kultureahket disdagaid
Guovdageainnu kulturskuvla ja Giellagiisá álggahit rabas kultureahkediid disdagaid.
Dohko leat čohkkeme ollu fálaldagaid maid kulturskuvla ja giellaguovddáš fállet.
Doppe leat čuojahan-, lávlun-, teáhter- ja duddjonkurssat ja giellagáffádat earret eará.
Suohkana girjerájus doallá rabas disdagaid ovddasguvlui juovllaid rádjái.
Giellagáffádat
Sii áigot maiddái rahpat sámegiela giellagáffádaga gos besset sámástit.
Dát lea juoga maid sámegielstudeanttat ja earát geat leat oahppagoahtán sámegiela leat sávvan.
Dál fállet sii sidjiide sámástangáffádaga, gos lea giellaláidesteaddji fárus ja geat jođihit ságastallamiid.
Gáffádat ja eará doaimmaid leat čohkken disdateahkediidda, go dalle rahpet olles kulturviesu iešguđet fálaldagaide.
Diehtojuohkinčoahkkin
Guovdageainnu kulturskuvla ja Giellagiisá bovdejit mánáid- ja nuoraidskuvlaohppiid ja váhnemiid ja joatkkaskuvlaohppiid diehtojuohkinčoahkkimii gos áigot almmuhit buot kurssaid ja doaimmaid mat álggahuvvojit ja mat leat jođus dán čavčča.
Sii leat bovden kursaoahpaheddjiid muitalit fálaldagain birra, nu ahte oasseváldit besset oaidnit ja gulahallat singuin.
Sii bovdejit maiddái servviid boahtit čalmmustahttit iežaset dán čoahkkimis, earret eará lea Sámi Oahppolihttu boahtime muitalit kurssaidis birra.
Oasseváldit besset maiddái buktit evttohusaid jus ležžet eará sávaldagat go dat mat fállojuvvojit.
– Mii bovdet diehtojuohkinčoahkkimii gos muitalit min fálaldagain, ja gos maiddái jearrat makkár sávaldagat mánáin, nuoraid ja rávisolbmuin leat. Kulturskuvlla ja Giellagiissá áigumuššan lea álggahit oktasaš doaimmaid Guovdageainnu álbmogii. Jurdda lea maiddái ovddidišgoahtit buriid fálaldagaid boahtteáiggis, lohkaba Giellagiissá Inga Ragnhild Gaino ja kulturskuvlla Inger Anne Gaup.
Diehtojuohkinčoahkkin lágiduvvo odne, skábmamánu 1. beaivvi, diibmu 18:00 Guovdageainnu kulturviesu kafeas.
