Riddu Riđđu AS stivrajođiheaddji Christina Henriksen muitala ahte sii leat duhtavaččat bargoveagain geat galget jođihit álgoálbmotfestivála ovddasguvlui. – Mis lea áigumuš ahte Riddu Riđđu galgá leat dat deháleamos álgoálbmotfestivála, lohká son preassadieđáhusas ja lohká jáhkkit ođđa festiválahoavdda ja beaivválaš jođiheaddji dahkat buori barggu.
Riddu Riđđu AS stivrajođiheaddji Christina Henriksen muitala ahte sii leat duhtavaččat bargoveagain geat galget jođihit álgoálbmotfestivála ovddasguvlui. – Mis lea áigumuš ahte Riddu Riđđu galgá leat dat deháleamos álgoálbmotfestivála, lohká son preassadieđáhusas ja lohká jáhkkit ođđa festiválahoavdda ja beaivválaš jođiheaddji dahkat buori barggu.
Internášunala eamiálbmotfestiválá Riddu Riđđu dieđiha preassadieđáhusas ahte sii leat ožžon ođđa beaivválaš jođiheaddji, seammás go ovddit beaivválaš jođiheaddji lávke festiválahoavdda virgái.
Riddu Riđđu AS stivrajođiheaddji Christina Henriksen lohká iežas duhtávažžan bargoveagain ja sus gal lea doaivva ahte soai nagodeaba loktet festivála vel dobbelii máilbmái.
Ođđa beaivválaš jođiheaddji ja festiválahoavda
Magne Harald Wilhelmsen, gii máŋŋemus golbma jagi lea bargan ekonomalaš- ja hálddáhuslašjođiheaddjin seamma festiválas, dat beassá dál lávket beaivválaš jođiheaddji virgái.
Magne Harald lea váldán ekonomalaš/hálddáhuslaš oahpu ja maiddái oahpaheaddjeoahpu. Ovdal son lea bargan joatkkaskuvlla oahpaheaddjin, autoriserejuvvon rehketdoallin ja Ivgobađa LHL-klinihka beaivválaš jođiheaddjin.
Karoline Trollvik, gii su ovdal lei beaivválaš jođiheaddji, bidjala ges festiválahoavdda gahpira seammás go álgá dáiddalaš jođiheaddji virgái.
(Ášši joatká gova vuolde)
Govven: Stig Brøndbo, Riddu Riđđu preassagovva
Loktet festivála máilbmai
Riddu Riđđu AS stivrajođihjeaddji Christina Henriksen lohká ahte Riddu Riđđu lea 25 jagis ovdánan ja sturron dan máđe ahte lea sajáiduvvan ja bargit maid leat lassánan.
Son muitala ahte dál lei áigi ovdánahttit festivála vel eanet, čáhkkehit saji dáiddalaš ovdáneapmái ja seammáš sihkkarastit stabilitehta hálddáhusas.
– Min áigumuš lea ahte Riddu Riđđu galgá leat dat deháleamos álgoálbmotfestivála. Festiválahoavda, gii maid lea dáiddalaš jođiheaddji, sáhttá loktet festivála vel dobbelii máilbmái ja buktit ođđa jurdagiid ja impulssaid midjiide, dan botta go beaivválaš jođiheaddji jođiha organisašuvnna dáppe ruovttus. Dat lea gelddolaš ja mii leat hirbmat duhtavaččat veagain geat galget Riddu Riđđu festivála 2018 jođihit, lohká Henriksen preassadieđáhusas.
