Áslat Holmberg válljejuvvui Sámiráđi presideantan Sámiid 22. konferánssa oktavuođas Jielleváris. Son váldá badjelasas doaimma Christina Henriksen maŋis gii lea nannosit jođihan Sámiráđi jagi 2020 rájes.
– Sámiráđđi lea vássán logi jagi áiggi šaddan guovddáš oassin mu eallimis. Sámiráđđi lea nanosmuvvan ja sturron ásahussan ja oainnán issoras stuorra kapasitehta min bargiid ja ráđđelahtuid gaskkas. Giitevašvuođain ja vuollegašvuođain válddán vuostá dán doaimma ja illudan bidjat návccaid Sámiráđđái, muitala Holmberg preassadieđáhusas.
Holmberg lea eret Njuorggámis. Son lea maŋemus logi jagi áigge bargan sámi ja álgoálbmotáššiiguin iešguđet álbmotorganisašuvnnain, sámedikkis ja maiddái aktivistan ja dutkin. Maŋemus viđa jagi áigge son lea doaibman Sámiráđi várrepresideantan ja son lea maid Suoma Sámedikki ovdalaš lahttu. Holmberg lea guolásteaddji, oahpaheaddji ja sus lea másterdutkus álgoálbmotoahpuin.
Sámiid 22. konferánsa nammadii áigodahkii 2022-2026 oktiibuot 15 fásta lahtu Sámiráđđái. Lahtut ovddastit Sámiráđi miellahttoorganisašuvnnaid. Juohke áidna lahtus lea maid persovnnalaš várrelahttu.
