Várnjárggas lea Norggas nannoseamos njállanálli, muhto liikká eai lassán njálat, baicca unnot.
Vaikke leat olu návccaid bidjan vai njálat lassánit, nu mo riebaniid báhččán, de liikká unnot njálat, dieđiha NRK Finnmark.
Gaskal 2015:i ja 2016:i eai gávdnan dutkit DNA eará go gaskal golmma ja viđa njálas Várnjárggas, Nuorta-Finnmárkkus.
Čivggadit njálaid
Várnjárgga ráfáiduvvanguovllu hálddašeaddji, Geir Østereng, muitala ahte sii áigot dál álgit čivggadit njálaid, ja de luoitit daid Várnjárgii.
Sii áigot maid biebmanstašuvnnaid ásahit, ja goanstabiejuid.
Biejut ja biebmanstašuvnnat leat ráhkaduvvon vai rieban, mii lea stuorit go njálla, ii čága daid revrriid mielde biepmu lusa, ii ge bidjui.
Mihttu lea njálačivggaid luoitigoahtit Várnjárgii 2018:s.
