-Almmuhus-
-Almmuhus-
-Almmuhus-
OĐĐASATMannan geasi leat olu njálat čivgan

Mannan geasi leat olu njálat čivgan

-

-

Mannan geasi ledje 72 ođđa njállačivgama Norggas, mii lea alimus lohku dan rájes go mihtidišgohte daid measta 20 jagi áigi. 

Várnjárggas ledje mannan geasi šaddan measta golmma geardde eanet njállačivggat go diibmá.

– Dál leat álggahan olu doaimmaid nannet njállanáli Norggas, ja lea somá oaidnit go barggut buktet bohtosiid. Dat duođašta ahte sáhttá jorgalahttit áitatvuloš náliid dili Norggas, dadjá Birasdirektoráhta direktevra Ellen Hambo NTB:i. 

Stáhta Luonddubearráigeahčču ja meahccegoziheaddjit máŋgga guovllus Norggas leat mannan geasi čoaggán dieđuid ja iskosiid njálaid gozihanprográmmii. Raporttain boahtá ovdan ahte fas orru šaddame olahusjahki njállačivgamiid dáfus. Gaskaboddosaš lohkamat čájehit ahte ledje 72 njállačivgama Norggas, ja dain ledje oktiibuot 334 čivgga. 

Loahpalaš logut dán jahkái bohtet juovlamánus, go Norgga Luonddudutkaninstituhtta (NINA) lea buohtastahttán ja dárkkistan loguid. Lea goitge dál juo čielggas ahte 2022:s leat leamaš vel eambbo njállačivgamat go ledje ovddit olahusjagi 2018:s. Dalle ledje 58 čivgama.

Maiddái Ruoŧas ja Suomas lea dán rádjái leamaš buorre jahki njálaide. Ruoŧas leat registreren 88 čivgama. Suomas, gos eai leat registreren njállačivggaid 1996 rájes, lea maid okta čivgan.

(©NTB)

-Almmuhus-