Sámegielat girječállit lohket mánáid- ja nuoraidgirjjiid viđa báikkis. Áigumuš lea movttiidahttit mánáid ja nuoraid lohkat ja čállit sámegillii.
Sámi Girječálliid Searvi (SGS) čađaha «Girječállit lohket mánáide ja nuoraide» nammasaš prošeavtta 2023 golggotmánu ja skábmamánu. Dáinna prošeavttain háliida SGS fuomášuhttit sámegiel mánáid- ja nuoraidgirjjiid.
Prošeakta álggahuvvo Badjemánáid mánáidgárddis Kárášjogas golggotmánu 11. beaivvi 2023.
Báikkálaš ja lagas birrasa girječállit čalmmustahttet iežaset girjjiid iežaset gielddas. SGS lea bovden mánáid ja nuoraid sámegielat girječálliid oassálastit prošektii.
Movttiidahttit mánáid ja nuoraid
Prošeakta čađahuvvo viđa sajis: Kárášjogas, Deanus, Ohcejogas, Guovdageainnus ja ruoŧabeale Gárasavvonis. Sámegielat mánáidgárdemánát, vuođđo- ja joatkkaskuvllaoahppit leat oasseváldit.
SGS ulbmil prošeavttain lea gaskkustit ja čalmmustahttit originála sámegiel mánáid- ja nuoraid girjjálašvuođa mánáidgárddiin, vuođđoskuvllain ja joatkkaskuvllain.
SGS háliida movttiidahttit sámegielat mánáid ja oahppiid lohkat sámegiel girjjiid ja čállit sámegillii, boahtá ovdan SGS preassadieđáhusas.
