Dál lea áigi evttohit evttohasaid Gollegiella bálkkašupmái, muitala Suoma Sámedikki árvvoštallanlávdegotti čálli Anne Kirste Aikio.
Gollegiella lea Davviriikkaid sámi giellabálkkašupmi mii geigejuvvo ovccát geardde čakčat.
Bálkkašupmi geigejuvvo Suomas, Helssegis, skábmamánus gos Davviriikkaid sámeministarat ja sámediggepresideanttat deaivvadit.
Giellabálkkašupmi addojuvvo ovttaskas olbmui, joavkkuide dehe organisašuvnnaide Norggas, Ruoŧas, Suomas dahje Ruoššas ja dasa gii lea ovddidan sámegiela sihke čálalaččat, njálmmálaččat dehe eará ládje. Bálkkašupmi sáhttá maid juhkkojuvvot.
Bálkkašupmi lea 15 000 euro. Gitta borgemánnui sáhttá evttohit evttohasaid. Dan čállá Norgga ráđđehus iežaset neahttasiiddus.
