Dál lahkonišgoahtá Norgga skuvllaid jahkásaš seksuálalašoahpahus. Dán jagáš fáddá lea erenomáš áigeguovdil, go dán jagi galget oahppat «miehtama» birra.
Juohke jagi lágida Sex og Politikk sierra kampánnjavahkku mas lea mihttu loktet seksuálaoahpahusmateriála. Maŋemuš guokte jagi leat 50 proseanta Norgga vuođđoskuvllain váldán atnui oahpponeavvuid.
Nu boahtá ovdán preassadieđáhusas.
Dán jagáš kampánnjas lea áigeguovdilis fáddá: miehtan. #læromsamtykke. Sex og Politikk leat sádden jearahallanskoviid skuvllaide, ja oahpaheaddjit leat ieža vástidan ahte dát lea fáddá mii lea dehálaš ja maid galggašedje oahpahit nuorat geardái.
Miehtan oahpahuvvo nuorran jo, ja luohkkálanjat ja skuvlašiljut leat dehálaš arenat gos ohppet dákkáriid. Seamma dehálaš go matematihkka ja vuojadeapmi, lea maid miehtan.
Álki deaivvadit hástalusaiguin
Lea dehálaš áigá jo álgit. Oahppoplánas čuožžu ahte oahppit galget vuosttaš luohkás jo oahppat iežaset rájáid birra, muhto maiddái galget oahppat mo dohkkehit earáid rájáid.
Dan dihte lea dehálaš ahte mánát ja nuorat ohppet miehtama birra. Go mánát sturrot eambbo, de galget oahppat seksuálalaš illasteami, rájáid ja doahttaleami birra, ja makkár reaiddut gávdnojit vai sáhttet vuhtiiváldit iežaset ja earáid rájáid.
– Jus oahppit ohppet dákkáriid jo skuvllas ja luohkkálanjas, de mii oaivvildit ahte sidjiide lea álkit dustet iešguđetlágan hástalusaid servodagas, čilge Sex og politikk oahpaheaddji ja seksuálaoahpahusa joavkojođiheaddji Vilde Graff Senje.
– Miehtan ii gula dušše seksuálaovttastallamii, muhto maiddái stoahkamii, speallamis ja feastas. Miehtan lea dehálaš buot osiin eallimis, deattuha Senje.
