NSR ja Sámedikki eanetlohkojoavku leat várren 100 000 ruvnno njuolggodoarjjan Dáiddadállui.
– Dáiddadállu lea mielde buktimin sámi dáidaga Norgga ja riikkaidgaskasaš dáiddamáilbmái. Sis leat leamaš máŋga dáiddabuktaga stuorra riikkaidgaskasaš dáiddaarenain, ovdamearkka dihtii sajiin Veneziabiennalen, Documenta ja OCA. Sis lea máilmmiviidosaš fierpmádat, dadjá sámediggeáirras Anne Henriette Nilut, NSR preassadieđáhusas.
Fievrridan sámi dáidaga máilbmái
Dáiddadállu lea Guovdageainnu dáiddárjoavku mas leat mielde dáiddárat geat barget earret eará filmmain, dánsumiin, visuála dáidagiin ja girjjálašvuođain, ja dálus leat máŋga sámi dovdoseamos dáiddára, nu go Máret Anne Sara, Elle Márja Eira, Mari Boine ja Per-Josef Idivuoma.
– Dáiddadállu addá dál hálddahuslaš doarjaga 19 dáiddárii ja kulturbargái, ja lea deaŧalaš oassi Sámi kulturealáhusas. Dáiddadállu lea dál doaibman eanaš eaktodáhtolaš barggu bokte, ja mii doaivut ahte go addit njuolggodoarjaga, de sáhttit veahkehit sin nu ahte oččošedje doarjaga maiddái eará doarjjaaddiin, dadjá Anne Henriette Nilut.
Dáiddadálu ruovttusuohkanis gal leat árvalan sihkastit doarjaga sidjiide. Guovdageainnu suohkana ovdagoddi lea evttohan sihkkut Dáiddadálu 230 000 ruvdnosaš doarjaga boahtte jagáš suohkanbušeahtas.
