Ođđa Davvisámi-suoma sátnegirjjis leat sullii 52 800 ohcansáni ja valjis ovdamearkkat eanas ohcansániid atninvugiin.
Dat sátnegirji lea viiddiduvvon veršuvdna Pekka Sammallahti sámi-suoma sátnegirjjis mii ilmmai 1989:s.
– Sátnegirji lea oppalaš ja maiddái deskriptiiva sátnegirji, muhto čujuha liikká muhtun boarásnuvvan dahje loatnasániid buohta dálá giela sániide ja lea dainna lágiin muhtin muddui maiddái preskriptiiva sátnegirji. Ulbmilin lea leamaš váldit girjái dakkár sániid maid lohkki sihke boarráset ja ođđaset teavsttaid logadettiin deaivida, čállá Davvi Girji preassadieđáhusas.
