Ođđa guorahallan čájeha ahte Moderna koronaboahkku lea 96 proseantta beaktil nuoraide gaskal 12-17 jagi.
Moderna lea čađahan vuosttaš dutkama mas guorahalle lea go sin koronaboahkku beaktil 12-17 jahkásaččaide.
Dutkan čađahuvvui USA:s ja das ledje oktiibuot 3235 oasseváldi. Guovttis golbmasis ožžo Moderna koronaboahku ja goalmmát oassi ges oaččui dálkkasnálu dálkkodeami ja doaimmai kontrollajoavkun.
Dutkan čájeha ahte Moderna koronaboahkku doaibma 96 proseantta nuoraide ja dasa lassin čájehuvvo ahte nuorra olbmot girdet dán boahku bures. Nuorat ožžo seamma liigeváikkuhusaid go ollesolbmot. Nuppi boahku maŋŋel vásihedje oaivebákčasa, váibasiid, galmmisteami ja deahkkebákčasiid. (©NTB)
