Pandemiija ráddje olbmo eallima ja dat váikkuha garrasit nuoraide geat muđui leat hui sosiálat. Ođđa guorahallan čájeha ahte 44 proseantta nuorra olbmuin dovdet iežaset oktonassan.
Badjel 2000 Norgga nuora leat muitalan iežaset dili birra «Yubo» guorahallamis, ja čájehuvvo ahte pandemiija gáržžidusat váikkuhit sin eallimii.
Masá juohke nubbi nuorra, dahje 44 proseantta nuorain dadjet ahte lea oktonas dál go koronavirus ráddje sin eallima.
Sii vástidit maiddái eará gažaldagaid pandemiija ektui. 47 proseantta dadjet ahte boahtteáigi vuorjašuhttá sin, 25 proseantta ballet ahte muhtin sin lagamusain buohccá koronavirusiin ja 4 proseantta ballet buohccámis covid-19 geažil.
Digitála máilmmis gulahallet
Nuorra olbmot leat dábálaččat hui sosiálat, muhto pandemiija geažil leat šaddan olu áiggi golahit ruovttus. Go eai beasa deaivvadit iežaset skihpáriiguin fysalaččat, de leat sirdán ovttastallama sosiála mediaide.
Oktiibuot vástidit 55 proseantta ahte ságastallet iežaset olbmáiguin sosiála mediain ja ahte dát maid doaibmá beanta bures. Masá juohke njealját nuorra áibbaša deaivvadit skihpáriiguin, muhto olles 34 proseantta nuorain loktet dán dilálašvuođas.
18 proseantta gal oaivvildit ahte lea menddo aktonas studeret dahje bargat ruovttus.
Guhtta diimmu sosiála mediain
Guorahallan čájeha ahte nuorat geavahit olu áiggi interneahtas ja sosiála mediain. 41 proseantta geavahit guhtta diimmu dahje eanet beaivái. 19 proseantta vástidit ahte leat gaskal vihtta ja guhtta diimmu sosiála mediain ja 22 proseantta ges gaskal njeallje ja vihtta diimmu. Dušše guokte proseantta geavahit vuollel diimmu sosiála mediaide.
– Mii vásihit ahte min fálaldat geavahuvvo eanet miehtá máilmmi ja Norggas lea appaid geavaheapmi lassánan golmmain gerddiin ođđajagemánu rájes. Lea áibbas čielggas ahte nuorat gulahallet digitálalaččat, dadjá Yubo mielálggaheaddji Sacha Lazimi preassadieđáhusas.
«Yubo» lea nuoraid digitála gulahallangaskaoapmi. Norggas leat 450 000 geavaheaddji ja máilmmis ges badjel 40 miljovnna geavaheaddji.
