Sámediggeráđđi lea 2021 bušeahttaevttohusas lasihan bissovaš doarjaga Sápmi Ealáhusgárdái ja Dáiddadállui. Protect Sápmi oažžu maid lasáhusa.
Ealáhusgárdi ja Dáiddadállu ožžo 2020 giđa ekonomalaš lasáhusa, vai buorebut sáhtte ealáhusaid veahkehit hástalusaiguin maid koronapandemiija dagahii.
Sámediggeráđđi evttoha dál Sápmi Næringshagii addit bissovaš kr. 400 000 lasáhusa ja kr. 100 000 Dáiddadállui 2021 bušeahttaevttohusas.
Lassin dasa Sámediggeráđđi evttoha lasáhusa Vuođđudus Protect Sápmái. Vuođđudusas lea ollu máhttu areálageavaheami birra, earenoamážit boazodoalus, ja bargá dainna áigumušain ahte sámi vuoigatvuođalaččat huksenáššiin galget beassat friija ja diehttevaš ovdagihtii miehtama addit. Sámediggeráđđi evttoha Protect Sápmái kr. 270 000 lasáhusa 2021 bušeahtas.
– Koronadoaibmabijut sámi ealáhus- ja kultureallimii lea maid doaibmabidju sámi servodahkii, ja mii áigut bargat dan maid sáhttit doaimmaid bisuheames dassážii go heahtedilli lea nohkan, muhto dalle dárbbašit maid liigeruđaid stáhtabušeahtas, deattuha Sámediggeráđi Silje Karine Muotka sin preassadieđáhusas.
Lassiruhta, stuorra dárbu
Sámediggi oaččui lassiruđa reviderejuvvon 2020 bušeahtas ealáhusdoaibmabijuide ealáhuseallima dili geažil, masa koronapandemiija lea unnit eanet váikkuhan. Čájehuvvui ahte lei stuorra dárbu ruđaide. 2021 stáhtabušehttii ii leat lassi dahje seammalágan ruhta biddjojuvvon.
Guokte goalmmádasa bušeahtas sámi ásahusaide
Sámediggi geavaha guokte goalmmádasa bušeahtas doarjagiidda sámi ásahusaide, sámi servodagaide ja sámi guovlluid álbmogii. Nu bušeahtta čájeha ahte juolludeapmi Sámediggái lea juolludeapmi oppa sámi servodahkii. Danne lea Sámediggi iežas váikkuhanortnegiiguin deaŧalaš veahkki barggolašvuođa bisuheames sihke priváhta ja almmolaš suorggis. Dat lea earenoamáš deaŧalaš koronapandemiija áiggis.
– Vaikke vel Sámediggi ii leatge 2021:s liigeruđa koronadoaibmabijuide ožžon, de Sámediggi oaidná dárbun ain fokusa atnit váikkuhangaskaomiid aktiivvalaš geavaheamis, mii ealáhus- ja kultureallima lossa dili sáhttá geahpedit, Sámediggeráđi Silje Karine Muotka loahpaha.
