Oahppit lassánit sámegielaid gáiddusoahpahussii olles Suomas dieđiha Suoma Sámediggi.
Sii fállet oahpahusa sihke anáraš-, nuortalaš- ja davvisámegiela vuođđooahpahusa ja logahatskuvlejumi dievasmahtti oahpahusa.
Suomas lea leamaš álggahanprošeakta fállat sámegielaid oahpahusa gáiddusin. Golbma jagi lea prošeakta leamaš jođus ja dan maŋemus jagi lea ohppiidlohku lassánan sullii 20 ohppiin. Nu čállá Suoma Sámediggi iežaset neahttasiiddus.
Mannan lohkanjagi sámegiela oahpahusa ožžo sullii 60 oahppi. Dál álgán lohkanjahkái leat almmuhuvvon badjelaš 80 oahppi ja studeantta miehtá Suoma.
Fállet oahpahusa
Sámegielaid gáiddusoahpahusa prošeakta fállá anáraš-, nuortalaš- ja davvisámegiela vuođđooahpahusa ja logahatskuvlejumi dievasmahtti oahpahusa. Oahpahus lea guokte diimmu vahkkui. Prošeakta váldá oahpahussii mielde maiddái ovdaskuvlaohppiid. Oahpahus lea oaivvilduvvon sámeohppiide sámiid ruovttuguovllu gielddaid olggobealde. Muhto prošeakta ii fála oahpahusa rávesolbmuide.
Almmuhanáigi sámegielaid gáiddusoahpahussii nogai njukčamánus, muhto sáhttá ain dieđihit ohppui gitta čakčamánnui. Oahpahus lea vuođđodásis iige oahppi dárbbaš máhttit sámegiela ovdalaččas. Oulus, Roavvenjárggas ja Helssegis lágidit maid davvisámegiela oahpahusa.
